બનાસકાંઠા: 196 કરોડના ખર્ચે બનેલો એલીવેટેડ બ્રિજ એક નાનકડી ભૂલના કારણે સ્વિમિંગ પુલ બની ગયો

કિશોર તુવર, બનાસકાંઠા: બનાસકાંઠાના ડીસામાં 196 કરોડના ખર્ચે બનેલ ગુજરાતના સૌથી લાંબા એલીવેટેડ બ્રિજ પર ગઈ કાલે ડીસામાં પડેલ 5 ઇંચ વરસાદમાં ઢીંચણ સમા પાણી ભરાઈ જતાં એલીવેટેડ બ્રિજ સ્વીમીંગ પુલમાં તબદીલ થયો હતો. જેને લઈને બ્રિજનો એક માર્ગ બંધ કરી દેવાયો હતો અને બ્રિજના બીજા માર્ગ ઉપરથી મહામુસીબતે ધીમેધીમે વાહનો પસાર થયા હતા. જેને લઈને બ્રિજની કામગીરી ઉપર અનેક સવાલો ઉઠ્યા હતા. તો બ્રિજ સ્વીમીંગ પુલ બની જતાં સમગ્ર દેશમાં ચર્ચાનો વિષય બન્યો હતો.

આ પુલ પર કેમ પાણી ભરાયું તેને લઈને ન્યૂઝ 18ની ટીમે ઓવર બ્રિજ પર પહોંચીને રીયાલીટી ચેક કર્યું તો જાણવા મળ્યું કે 196 કરોડના ખર્ચે બનેલ પુલ પર હાઇવે ઓથેરેટી અને વહીવટી તંત્રની અનેક બેદરકારી સામે આવી હતી.

સાડાચાર કિલોમીટર લાંબા બ્રિજ પર બંને સાઈડો પર 5-5 મીટરના અંતરે બ્રિજ પરથી વરસાદી પાણી નીચે ઉતરે તે માટે હોલ બનાવી તેના ઉપર જાળી રાખવામાં આવી હતી. જોકે ચોમાસા પૂર્વે તે હોલની સફાઈ ન કરતાં બ્રિજ પરના તમામ હોલ પુરાઈ ગયા હતા. જેને લઈને બ્રિજ પરથી વરસાદી પાણી નીચે ઉતરી શક્યું નહીં અને બ્રિજના અધવચ્ચે કોઈપણ પ્રકારનો ઢાળ ન હોવાથી સમતલ જગ્યામાં પાણી એકઠું થયું હતું. અને બ્રિજ ઉપર કમર સુધી પાણી ભરાઈ જતા બ્રિજ સ્વીમીંગ પુલમાં તબદીલ થઈ ગયો હતો.

જોકે આવી સ્થતિમાં 5 ઇંચ કરતા વધારે વરસાદ પડ્યો હોય તો બ્રિજ ઉપર થઈને પાણી વહેતુ થયું હોત અને બ્રિજ તૂટીને પડી ગયો હોત તેવી પણ શકયાતાઓ હતી. જોકે વરસાદ બંધ થઈ જતા નેશનલ હાઇવે દ્વારા બ્રિજના હોલની સફાઈ કરતા પાણી બ્રિજ ઉપરથી નીચે ઉતરી ગયું હતું.

હવે બ્રિજના ઉપરના તમામ પાણીના હોલની સમયસર સફાઈ થાય અને બ્રિજ ઉપરની સમતલ જગ્યાએથી ઢાળ ઉતારવામાં આવે તેવી લોક માંગ ઉઠી છે.