અંબાજીમાં શરદ મહોત્સવની ઉજવણી, 30 હજાર દિવડાઓથી ઝગમગ્યું શક્તિપીઠ, જુઓ તસવીરો

આજે શરદ પુનમના દિવસે અંબાજી મંદિરે માનવ મહેરામણ ઉમટ્યું છે. ભક્તોએ માં અંબાના દર્શન કરી ધન્યતા અનુભવી છે. શરદપૂર્ણિમાંના દિવસે જગત જનની મા અંબાની મંગળા આરતી સવારે 6 કલાકે કરાઈ હતી. આરતી ટાણે માં અંબાના માઈ ભક્તો ભાવવિભોર બન્યાં હતા. ત્યાં જ માં અંબાના દિવ્ય દર્શન અને મંગળા આરતીનો લાભ લેવા માટે દર્શનાર્થીઓની વહેલી સવારથી મોટી કતારો લાગી હતી.

શરદ પૂર્ણિમા નિમિત્તે યાત્રાધામ અંબાજી યાત્રાળુઓથી ઉભરાઈ ગયું હતું અને માં અંબાના ચાચર ચોકમાં પણ માઇ ભક્તોનો ઘસારો જોવા મળ્યો હતો. મંદિરમાં માં અંબાની જય-જયકાર સાથે ભક્તિનો માહોલ સર્જાયો હતો.

શક્તિપીઠ અંબાજીમાં આજે શરદ મહોત્સવની ઉજવણી થઇ હતી. જે અંતર્ગત અંબાજીના ચાંચર ચોકમાં મહાઆરતીનું આયોજન કરાયું હતું. જેમાં 30 હજાર દીપ પ્રગાટાવવામાં આવ્યા હતા. જેમા ગૃહ રાજ્યમંત્રી હર્ષ સંઘવી સહિત અનેક નેતાઓ ઉપસ્થિત રહ્યા હતા, સાથે જ ધારાસભ્યો અને સાંસદ સભ્યો પણ ઉપસ્થિત રહ્યા હતા.

શરદ મહોત્સવની ઉજવણી દરમિયાન અંબાજીના સ્થાનિક વેપારીઓએ પોતાની દુકાનની લાઇટો બંધ રાખી હતી અને તે સમયે મંદિર પ્રાગણમાં 30,000 દિવાઓ પ્રગાટવાતા જ એક સુંદર નજારો જોવા મળ્યો હતો. જે બાદ ચાંચર ચોકમાં બહેનોએ ગરબાની રમઝટ બોલાવી હતી.

આજે શરદ પૂર્ણિમા નિમિત્તે રાત્રે 12 વાગ્યે વિશેષ આરતી સાથે દૂધ પૌઆનો કાર્યક્રમ યોજાશે.