બનાસકાંઠા: રોડ પર આખલો આવી જતા બુલેટ ચાલક આર્મી જવાને જીવ ગુમાવ્યો, સમગ્ર પંથકમાં અરેરાટી

બનાસકાંઠા: છેલ્લા થોડા દિવસથી રાજ્યના વિવિધ શહેરોમાં રખડતા ઢોરનો ત્રાસ ખૂબ વધી ગયો છે. દરરોજ રખડતા ઢોર (Stray cattle)ને કારણે કોઈ ઈજાગ્રસ્ત થયું હવાના સમાચાર પ્રાપ્ત થઈ રહ્યા છે. આ જ કડીમાં હવે બનાસકાંઠામાં એક આર્મી જવાને (Army Jawan) જીવ ગુમાવ્યો છે. અકસ્માતમાં આર્મી જવાનનું મોત થતાં સમગ્ર પંથકમાં અરેરાટી વ્યાપી ગઈ છે. બીજી તરફ રખડતા ઢોરના ત્રાસમાંથી મુક્તિ અપાવવાની માંગ ઉઠી છે. એવી માહિતી મળી છે કે આસામ ખાતે ફરજ બજાવી રહેલો જવાન ગાંધીનગર આવ્યા બાદ બુલેટ (Bullet bike) લઈને પોતાના વતન આવી રહ્યો હતો. આ દરમિયાન રાત્રે એક આખલો રોડ પર આવી જતાં જવાનને અકસ્માત (Road accident) નડ્યો હતો. અકસ્માતમાં આર્મી જવાને જીવ ગુમાવ્યો હતો.

આખલો રસ્તા પર આવી ગયો : મળતી માહિતી પ્રમાણે કાંકરેજના અરકુંવાડા પાસે એક આખલો રસ્તા પર આવી ગયો હતો. આ દરમિયાન દિયોદરના વડિયા ગામ (Vadiya village)ના અરમરભાઈ માળી (Amratbhai Mali) બુલેટ લઈને પસાર થઈ રહ્યા હતા. રાત્રે આખલો રસ્તા વચ્ચે આવી જતાં તેઓ રોડ પર પટકાયા હતા. મળતી માહિતી પ્રમાણે અમરતભાઈ બુલેટ પર સવાર થઈને ગાંધીનગરથી પોતાના વતન તરફ જઈ રહ્યા હતા.

આસામમાં ફરજ બનાવી રહ્યા હતા: એવી વિગતો મળી છે કે મૃતક આર્મી જવાન અમરતભાઈ આસામ ખાતેથી ગાંધીનગર આવ્યા હતા. ત્યાંથી બુલેટ લઈને પોતાના વતન દિયોદરના વડિયા ગામ ખાતે જવા માટે નીકળ્યા હતા.

અમરતભાઈ આસામ ખાતે આર્મીમાં પેરાકમાન્ડો તરીકે ફરજ બજાવતા હતા. આખલો વચ્ચે આવી જતાં તેઓ નીચે પટકાયા હતા અને ઘટનાસ્થળે જ મોતને ભેટ્યા હતા.

બનાવ બાદ શિહોરી પોલીસ ઘટના સ્થળે પહોંચી હતી અને તપાસ આદરી હતી. બાદમાં તેમના મૃતદેહને પોસ્ટ મોર્ટમ માટે ખસેડવામાં આવ્યો હતો.

અકસ્માતમાં એક જવાનનું મોત થતા સમગ્ર પંથકમાં અરેરાટી વ્યાપી ગઈ હતી. મૃતક અમરતભાઈ ફરજ પરથી પોતાના વતન તરફ આવી રહ્યા હતા ત્યારે જ અકસ્માતમાં મૃત્યું થતાં પરિવારમાં ખુશીનો માહોલ માતમમાં ફેરવાયો હતો.

રોડ અકસ્માતમાં જીવ ગુમાવનારા આર્મી જવાન બુલેટ બાઇક પર પોતાના વતન વડિયા ખાતે આવી રહ્યા હતા.

પુત્ર ઘરે આવતો હોવાથી પરિવારમાં ખુશી હતી. જવાને અકસ્માતમાં જીવ ગુમાવતા ઘરે માતમ છવાયો.