બનાસકાંઠા: વરસતા વરસાદમાં એક કિલોમીટર કાદવમાં ચાલી 108ની ટીમે મહિલાની કરાવી સફળ પ્રસૂતિ

કિશોર તુવર, બનાસકાંઠા : પાલનપુર (Palanpur) પંથકમાં 108ના કર્મચારીઓએ (108 emergency service) વરસતા વરસાદમાં એક કિલોમીટર કાદવ કીચડવાળા રસ્તામાં ચાલીને પ્રસૂતા મહિલાના (woman delivery in 108) ઘરે પહોંચી ટોર્ચ લાઈટના સહારે મહિલાની સફળ પ્રસુતિ કરાવી છે.  જે બાદ સ્ટ્રેચર ઉપર સુવાડી એક કિલોમીટર ચાલી 108 સુધી લાવી તેમને હોસ્પિટલમાં ખસેડતા 108ની ટીમનું સરાહનીય કામ સામે આવ્યું છે.

પાલનપુરની 108ની ટીમને મોડી રાત્રે  વરસતા વરસાદમાં એક કોલ મળ્યો હતો કે, પાલનપુરના સદરપુર ગામમાં એક મહિલાને પ્રસવપીડા ઉપડી છે. તેથી 108 ટીમના ઇએમટી ધવલ જેતપુરા અને પાઇલોટ મહેન્દ્રભાઈ તાત્કાલિક 108 લઈને સદરપુર પહોંચ્યા હતા. જોકે, મહિલાનું ઘર ખેતરમાં હોવાથી અને ખેતરમાં જવાના રસ્તા ઉપર પાણી ભરેલું હોવાથી 108  મહિલાના ઘર સુધી જઈ શકે તેમ ન હોવાથી 108ના ઇએમટી ધવલભાઈ અને પાયલોટ મુકેશભાઈ 108માંથી  સ્ટ્રેચર,સ્પાઇન બોર્ડ અને ડિલિવરી કિટ લઈને કાદવ કીચડવાળા રસ્તા ઉપર એક કિલોમીટર ચાલીને પ્રસૂતા મહિલાના ઘરે પહોંચ્યા હતા.

જોકે મહિલાને લેબર પેઈન થતાં ઇએમટી ધવલભાઈ અને પાયલોટ મુકેશભાઈએ ડોકટરનો કોન્ટેક કરી તેમની સલાહ મુજબ બેટરીના ટોર્ચ દ્વારા મહિલાની સફળ ડિલિવરી કરાવી. જોકે બાળકનો રડવાનો અવાજ ન આવતો હોવાથી બાળકીને ચેક કરતા તેનામાં ઓક્સિજન ઓછું હોવાનું જણાતાં તેને માઉથ વડે ઓક્સિજન આપવામાં આવ્યું હતુ. જે બાદ માતા અને બાળકને સ્ટ્રેચર ઉપર સુવાડી એક કિલોમીટર ચાલીને 108 સુધી લાવી તેમને 108 દ્વારા સિવિલ હોસ્પિટલમાં પહોંચાડ્યા હતા.

સદરપુર ગામની મહિલાને અડધી રાત્રે પ્રસુતિનો દુખાવો ઉપડતા તેના પતિએ 108ને ફોન કરતાં તાત્કાલિક 108 ગામમાં તો પહોંચી પણ ખરાબ રસ્તાના કારણે અને ચાલુ વરસાદે 108 મહિલાના ખેતરના ઘર ઉપર પહોંચી શકે તેમ ન હતી. છતાંપણ 108ના કર્મચારીઓએ પરત ફરવાની જગ્યાએ માનવતા બતાવી એક કિલોમિટર ચાલતા મહિલાના ઘરે પહોંચી તેની સફળ પ્રસુતિ કરાવતાં મહિલા અને તેના પતિ 108ના કર્મીઓનો આભાર માની રહ્યા છે અને સરકારની 108 સેવાની સરાહના કરી રહ્યા છે.

સરકાર દ્વારા 108ની સેવા લોકો માટે વરદાન રૂપ સાબિત થઈ રહી છે અને તેવામાં આવા 108ના માનવતાવાદી કર્મચારીઓના કારણે 108ની સેવા લોકો માટે ભગવાનના વરદાનરૂપ સાબિત થઈ રહી છે.