આણંદ: નબીરાઓની દારૂ પાર્ટી પર રેડ, પોલીસે રંગમાં ભંગ પાડી 25 યુવક-યુવતીને પકડ્યા

આણંદ: ગુજરાતમાં દારૂબંધી છતાં લોકો દારુની મહેફિલોની જમાવટ કરતાં હોય છે. યુવક-યુવતીઓ ગામના છેવાડે જઇને પણ દારૂ પાર્ટીનું આયોજન કરતાં હોય છે અને પોલીસ દ્વારા અવાર-નવાર આવી પાર્ટીઓ પર તવાઇ બોલાવવામાં આવે છે, ત્યારે વધુ એક દારૂ પાર્ટી પર પોલીસે રેડ પાડી છે. ફાર્મ હાઉસમાં દારુની મહેફિલ માણવી યુવક-યુવતીઓને ભારે પડી છે. પોલીસે ફાર્મ હાઉસમાં જામેલી દારુની મહેફિલ પર રેડ પાડી 25 યુવક-યુવતીઓને પકડ્યા છે. સાથે જ પોલીસે ફાર્મ હાઉસમાંથી દારુની 10 બોટલો પણ કબ્જે કરી છે.

આણંદના આંકલાવ તાલુકામાં આવેલા એક ગામમાં જન્મદિવસની આડમાં ચાલતી દારૂની મહેફિલ પર પોલીસે દરોડા પાડ્યા છે. દરોડા દરમિયાન પોલીસે શ્રીમંત પરિવારના લગભગ 25 યુવક-યુવતીઓની ધરપકડ કરી છે. દારૂની મહેફિલ માણતાં વડોદરાના 15 યુવાનો અને 10 યુવતીઓની પોલીસ દ્વારા ધરપકડ કરવામાં આવી છે. આંકલાવ પોલીસે નવાખલના ફાર્મ હાઉસમાંથી આ લોકોને ઝડપી પાડ્યા છે.

પોલીસે શ્રીમંત પરિવારના યુવક-યુવતીઓની મહેફિલમાં રંગમાં ભંગ પાડ્ય હતો અને 10 જેટલી દારૂની બોટલો પણ કબ્જે કરી હતી. સાથે જ આઠ ટૂ વ્હીલર અને એક કાર તથા મોબાઇલ ફોન સહિત કુલ 11 લાખનો મુદ્દામાલ કબ્જે કર્યો છે.

મળતી માહિતી અનુસાર, આંકલાવના માનપુરા ગામે ગ્રીન ટોન નામના ખાનગી ફાર્મ હાઉસ પર રેડ દરમિયાન દારૂની મહેફિલ ઝડપાઇ હતી. અહીં જન્મદિવસની આડમાં દારૂની મહેફિલ ચાલી રહી હતી. જોકે, પોલીસે રેડ પાડતાં જ આ તમામ યુવક-યુવતીઓમાં સોંપો પડી ગયો હતો. હાલ પોલીસે તમામ નબીરાઓની ધરપકડ કરી આગળની કાર્યવાહી શરૂ કરી છે.

પોલીસ ગિરફતમાં આવેલા તમામ નબીરા વડોદરાના રહેવાસી છે. ઉપરાંત યુવાનો દારૂ ક્યાંથી લાવ્યા અને ફાર્મ હાઉસના માલિક પાસે ફાર્મ ભાડે આપવાની પરવાનગી છે કે કેમ? તે તમામ મુદ્દે પોલીસ દ્વારા તપાસ હાથ ધરવામાં આવી છે.