કોરોના કહેર વચ્ચે હોળીના તહેવારોને લઈ એસટી નિગમનું આવું છે ખાસ આયોજન

વિભુ પટેલ, અમદાવાદ : હોળીના તહેવારોમાં મોટી સંખ્યામાં લોકો પોતાના વતન જાય છે. જેમાં પંચમહાલ, દાહોદ તેમજ રાજસ્થાન તરફ મુસાફરોનું ટ્રાફિક વધારે હોય છે. જેને લઈ એસટી નિગમ દ્વારા વિશેષ આયોજન કરવામાં આવ્યું છે. અમદાવાદથી પંચમહાલ તરફ જવાનું ટ્રાફિક વધતાની સાથે રોજની 15થી 20 બસનું એકસ્ટ્રા સંચાલન કરવામાં આવશેય તો સુરતથી પણ 25 માર્ચથી 200 વધારાની બસો દોડાવવામાં આવશે.

એસટી નિગમના સચિવ કે. ડી. દેસાઈએ ન્યૂઝ 18 ગુજરાતી સાથે વાત કરતા જણાવ્યું હતું કે દર વર્ષે તહેવારોમાં મુસાફરો ધસારો વધતો હોય છે. જેને લઈ એસટી નિગમ આગોતરું આયોજન કરે છે અને ચાલુ વર્ષે પણ હોળીના તહેવારને લઈ આગોતરું આયોજન કરવામાં આવ્યું છે. મુસાફરોના ધસારાને પહોંચી વળવા માટે એસટી નિગમ સજ્જ છે. મુસાફરો ખોટી ભીડ ના કરે. સ્ટેશન પર કર્મચારીઓ અને મુસાફરો કોરોનાની ગાઈડલાઈનનું પાલન કરે.

સુરત, અમદાવાદમાં કોરોના કેસ વધારે છે તો મહારાષ્ટ્રમાં પણ કોરોનાનો કહેર છે. જેને લઈ મહારાષ્ટ્રમાંથી આવતી એસટી બસમાં પ્રવાસ કરતા પ્રવાસીઓના નિર્જર, ઉછલ અને સોનગઢ ખાતે કોરોના રિપોર્ટ કરવામાં આવે છે અને ત્યાર બાદ જ મહારાષ્ટ્રમાંથી આવતી એસટી બસને ગુજરાતમાં પ્રવેશ આપવામાં આવે છે.

ગત વર્ષે પણ હોળી ધુળેટીના તહેવારમાં 2,78000 પ્રવાસીઓએ પ્રવાસ કર્યો હતો. તેમજ 3 કરોડ 43 લાખની આવક થઈ હતી.