અમદાવાદ: શહેરને પ્રદૂષિત કરતા લોકોની હવે ખેર નથી, પીસીબીએ એક વેપારીની કરી ધરપકડ

નવીન ઝા, અમદાવાદ: અમદાવાદ શહેરમાં કેટલાક વેપારીઓ પોતાના ફાયદા માટે લોકોના જીવને જોખમમાં મૂકી દેતા હોય છે. જેને લઈને જીપીસીબી (Gujarat Pollution Control Board)ને કાર્યવાહી કરવાની સત્તા આપવામાં આવી છે. અમદાવાદના રામોલ વિસ્તારમાં PCBએ ઘટનાની ગંભીરતાને જોઈને જીપીસીબીને સાથે રાખી એક ખુલ્લા મેદાનમાં ગંદકી ફેલાવવા મામલે કાર્યવાહી કરીને એક વેપારીની ધરપકડ કરી લીધી છે. હાલ પીસીબીએ આરોપી સામે 284, 278 અને પર્યાવરણ સુરક્ષા અધિનિયમ 1986 કલમ 7,8,15(1) મુજબ ગુનો દાખલ કર્યો છે. આ ગુનામાં અન્ય કોઈ આરોપી સામેલ છે કે નહીં તેની તપાસ શરૂ કરવામાં આવી છે.

પીસીબી (Pollution Control Board)ને માહિતી મળી હતી કે રામોલ વિસ્તારમાં સાજીદ અંસારી નામનો એક વ્યક્તિ પોતાની જગ્યામાં સેડ બનાવીને સેડમાં પ્લાસ્ટિકના જોખમી ઘન કચરાનું પ્રોસેસિંગ કરી પોતાના સેડની સામે ખુલા ખેતરમાં પ્રદૂષિત પાણી સહિત જોખમકારક વસ્તુઓ ફેંકી રહ્યો છે.

માહિતીના આધારે પીસીબીએ કાર્યવાહી કરીને તેની ધરપકડ કરી છે. મળતી માહિતી પ્રમાણે જે ખેતરમાં તે આ કચરો ફેંકી રહ્યો છે તે ખેતર એક વ્યક્તિ પાસેથી મહિને 7 હજાર રૂપિયા આપી ભાડેથી લીધેું હતું.

આ પ્રોસેસ માટે તેણે કોઈ સરકારી પરવાનગી લીધી છે કે કેમ તે વિશે પૂછતાં તેણે જણાવ્યું હતુ કે, આ બાબતે કોઈ પરવાનગી લીધી નથી. આ બાબતે તેની ધરપકડ કરી આગળની કાર્યવાહી માટે રામોલ પોલીસને સોંપી દેવામાં આવ્યો છે.

મહત્ત્વની વાત એ છે કે આવી તો એક વ્યક્તિની ધરપકડ કરવામાં આવી છે, પરંતુ આવા અનેક લોકો નદીઓમાં કેમિકલયુક્ત પાણી નાખીને લોકોના જીવ સાથે રમત રમી રહ્યા છે.

આ તમામ સામે જીપીસીબીએ કાર્યવાહી કરવી જોઈએ. હાલ પીસીબીએ આરોપી સામે 284, 278 અને પર્યાવરણ સુરક્ષા અધિનિયમ 1986 કલમ 7,8,15(1)મુજબ ગુનો દાખલ કર્યો છે. આ ગુનામાં અન્ય કોઈ આરોપી સામેલ છે કે નહીં તેની તપાસ શરૂ કરવામાં આવી છે.