PMનો ગુજરાતમાં બીજો દિવસ, ચાર જગ્યાએ વિશાળ જનમેદનીને વિકાસનો હિસાબ-કિતાબ આપ્યો

વડાપ્રધાન નરેન્દ્ર મોદીએ બીજા દિવસે સૌરાષ્ટ્રમાં ચૂંટણી પ્રચાર કર્યો હતો. તેમણે સૌથી પહેલા સવારે વેરાવળમાં આવેલા સુપ્રસિદ્ધ યાત્રાધામ અને પ્રથમ જ્યોતિર્લિંગ ગણાતા એવા સોમનાથ મહાદેવના દર્શન કર્યા હતા અને ત્યારબાદ વેરાવળમાં વિશાળ જનમેદનીને સંબોધન કર્યુ હતુ.

વડાપ્રધાન નરેન્દ્ર મોદીએ આગવા અંદાજમાં વેરાવળના સંબોધનમાં કહ્યુ હતુ કે, ‘નરેન્દ્રના તમામ રેકોર્ડ ભૂપેન્દ્ર તોડે તેવી મારી ઇચ્છા છે. અત્યાર સુધી 1-1 રન કર્યા છે, હવે શતક જ કરવાના છે’.

તેમણે અમરેલીમાં પણ લાખો લોકોને સંબોધ્યા હતા. તેમણે કહ્યુ હતુ કે, ‘અમરેલી જિલ્લો હવે દરિયાઈ વેપારનું ધમધમતું કેન્દ્ર બનવાની તૈયારીમાં છે. જે ઇતિહાસમાં એક નવો અધ્યાય જોડશે. મારો વિશ્વાસ કરો, ગુજરાતમાં કૃષિ વિકાસ દર માઈનસમાં હતો, તે હવે અમારી અમારી મહેનતના કારણે બે આંકડામાં આવી ગયો છે.’

વડાપ્રધાન નરેન્દ્ર મોદીએ બોટાદની જનસભામાં કહ્યુ હતુ કે, ‘ભારતીય જનતા પાર્ટી વિકાસની ગેરંટી છે. અમે મજબૂતી લાવવા માગીએ છીએ. અમે 100 વર્ષનું કામ પૂરું કરવા માગીએ છીએ. જેથી આગામી સમયમાં ગુજરાતને પાછું વળીને જોવું નહીં પડે.’

વડાપ્રધાને બોટાદમાં જનસંબોધન વખતે કોઈપણ પાર્ટીનું નામ લીધા વગર તેમણે અન્ય પાર્ટી પર પ્રહાર કરતા કહ્યુ હતુ કે, ‘આ બધા લોકો જે બહારથી આવીને ગુજરાતને બદનામ કરવાનું અભિયાન ઉપાડ્યું છે. આ નકારાત્મકતાથી કોઈનું ભલું નથી થવાનું છે. તે બધાએ પોતાના ઘર ભરવા માટે જિંદગી ખપાવી દીધી છે.’

તેમણે વધુમાં પ્રહાર કરતા કહ્યુ હતુ કે, ‘આપણે ગુજરાતને સમૃદ્ધ બનવાનું છે. ગુજરાતને ચેતનવંતુ બનાવવું છે. ગુજરાતના વિકાસમાં રોડા અટકાવવાવાળા, વાર-તહેવારને ગુજરાતીઓને ગાળો આપનારી આખી જમાતને અહીંથી વિદાય આપવાની જરૂર છે.’

આમ, વડાપ્રધાન નરેન્દ્ર મોદીએ બીજા દિવસે ચૂંટણી પ્રચારમાં જમાવટ કરી દીધી હતી. ચાર સ્થળોએ વિશાળ જનમેદનીને સંબોધન કરી ભાજપ સરકારે કરેલા તમામ વિકાસના કર્યોનો હિસાબ-કિતાબ આપ્યો હતો.