અરે બાપ રે! ફરી થશે માવઠું, અંબાલાલ પટેલની મોટી આગાહી

વિભુ પટેલ, અમદાવાદ: સાયક્લોનિક સર્ક્યુલેશનના કારણે રાજ્યમાં છેલ્લા એક સપ્તાહથી ગાજવીજ સાથે વરસાદ થયો છે અને કૃષિ પાકને નુકસાન થયું છે. લોકો માવઠું જાય તેની રાહ જોઈએ રહ્યા છે, ત્યારે હવામાન વિભાગની આગાહી પ્રમાણે તો ખેડૂતો માટે સારા સમાચાર છે. આગામી 4 દિવસ વાતાવરણ સૂકું રહેશે. જોકે, હવામાન વિભાગનું અનુમાન છે કે એક વેસ્ટન ડિસ્ટર્બન્સ થવાની શક્યતા છે. જેના કારણે 29મીએે ફરી વાદળો આવવાની શક્યતા છે.

હવામાન નિષ્ણાત અંબાલાલ પટેલે માર્ચ મહિનામાં વારંવાર માવઠું થવાની આગાહી મહિનાઓ પહેલા કરી દીધી હતી અને માર્ચ મહિનામાં માવઠું પણ થયું છે. માર્ચના અંતમાં ફરી વાતાવરણમાં પલટો આવવાનું અનુમાન છે. 26થી 28 માર્ચ દરમિયાન ફરી માવઠું થવાના એંધાણ છે.

અરબી સમુદ્રનો ભેજ ગુજરાત તરફ આવશે. દરિયામાં ઊંચા મોજા ઉછળશે અને ભારે પવન ફૂંકાશે. જેની અસરના કારણે દક્ષિણ ગુજરાત, ઉતર ગુજરાત અને સૌરાષ્ટ્રના અમુક ભાગોમાં હળવું માવઠું થવાનું અનુમાન છે.

જોકે, માવઠું પછી માવઠું ચાલુ જ રહેશે. એપ્રિલના પહેલા સપ્તાહમાં વાતાવરણમાં પલટો આવશે અને દક્ષિણ ગુજરાત, મધ્ય ગુજરાત, ઉત્તર ગુજરાત, કચ્છ, સૌરાષ્ટ્રને માવઠાનો માર પડશે. મેં મહિનામાં આંધીનું પ્રમાણ વધશે, જ્યારે 20 એપ્રિલ પછી ગરમી પડશે. ઉપરાંત અમુક ભાગોમાં 45 ડિગ્રી તાપમાન પહોંચી જશે.

હવામાન વિભાગનું ફરી એક વેસ્ટન ડિસ્ટર્બન સક્રિય થવાનું અનુમાન છે. 29 માર્ચે વાદળ આવવાની શક્યતા છે. જોકે, વરસાદ થશે કે નહીં, તેની કોઈ સ્પષ્ટતા નથી. પરંતુ વેસ્ટન ડિસ્ટર્બન સક્રિય થયા બાદ આ બાબતનો અંદાજો આવી શકે તેમ છે. પરંતુ હાલ પૂરતા તો વાદળો આવવાનું અનુમાન છે. જ્યારે આગામી 4 દિવસ માવઠાથી છૂટકારો મળશે અને મહત્તમ તાપમાન 3થી 4 ડિગ્રી વધી જશે.