Ahmedabad: ચકી બેન ચકી બેન મારી સાથે રમવા આવશો કે નહી..આ શાળામા વિદ્યાર્થીઓએ યુનિક મળા તૈયાર કર્યા, Photo

Parth Patel, Ahmedabad: ચકી બેન ચકી બેન મારી સાથે રમવા આવશો કે નહી...આ ગીત હવે સાંભળવા જ મળે છે. ભલેને સરકાર, સમાજ કે માનવીઓ ચકલીઓને લુપ્ત થતી બચાવવા પ્રયાસ ના કરતા હોય પરંતુ દસક્રોઈ તાલુકાના રોપડા પ્રાથમિક શાળામાં શિક્ષકો અને વિદ્યાર્થીઓએ યુથ સર્વ ફાઉન્ડેશનના સહયોગથી 2 વર્ષથી અથાગ પ્રયાસ કરવામાં આવી રહ્યો છે. દર સાલ 100 થી વધુ માટીના માળા શાળા પરિસરના વૃક્ષો પર લગાવવામાં આવે છે.

ગયા વર્ષે 100 જેટલા ચકલીઓ માટે માટીના માળા વૃક્ષો પર ફિટ કરવામાં આવ્યા હતા. જેમાં ચકલી, દેવ ચકલી, બુલબુલ, ખિસકોલીઓએ વસવાટ કર્યો છે. તેઓનો પરિવાર વધતા શિક્ષકો વિધાર્થીઓ અને ફાઉન્ડેશને વધુ 150 જેટલા માળા મુક્યા છે. આ સાથે માળાને રંગરોગાન કરી અને નંબર આપી સુંદર રીતે સજાવી વૃક્ષો પર લગાવ્યા છે.

આપણે પહેલા કાચા ઘરમાં રહેતા પછી આવક સારી થાય તેમ ઘરને આલીશાન બનાવવા પ્રયત્ન કરતા. વળી અત્યારે લોકો મોર્ડન ઘરોમાં વસવાટ કરતા થયા છે. ત્યારે આ અબોલ પશુ-પંખીના રહેઠાણને આકર્ષક અને મોર્ડન બનાવવાનો પ્રયત્ન એ આ યુવાધન પ્રકૃતિ પ્રત્યેના પ્રેમનું ઉત્તમ ઉદાહરણ છે.

આ વખતે પણ બાળકોને સાથે રાખી વિવિધ મનપસંદ ડિઝાઇન તૈયાર કરી તેના પર નંબર લેખન પણ કરવામાં આવ્યું છે. જેથી દરેક વિદ્યાર્થી પોતાના કાર્ય અને નંબર દ્વારા માળાની ઓળખ કરી શકે.

યુથ સર્વ ફાઉન્ડેશન દ્વારા દર વર્ષે 2 કે 3 વૃક્ષ પર આવા આશિયાના લગાવવા અભિયાન ચાલુ રાખશે તેવી આશા પણ વ્યક્ત કરી છે. સાથે યુવાઓ પોતાની પોકેટમનીમાંથી બચત કરી સોમવારે વધુ 150 માળા લઈ આવેલા અને આ માળાઓને શાળાના બાળકોએ રંગરોગાન કરી શૈક્ષણિક આશિયાના બનાવવામાં આવ્યા હતા.

એક સમય હતો કે જ્યારે ચકલીઓની ચિચિયારી ગામડા અને શહેરોમાં સાંભળવા મળતી હતી. પરંતુ બદલાતા સમયની સાથે ધીમે ધીમે ચકલીઓની પ્રજાતી લુપ્ત થવા લાગી છે અને ચકલીનો કલરવ સાંભળવો દોહલો બન્યો છે. આથી ચકલીની પ્રજાતીને લુપ્ત થતી અટકાવવા માટે સમગ્ર વિશ્વમાં આ પ્રકારના પ્રયત્ન કરવામાં આવે છે.