ભેજાબાજ યુવક! અમદાવાદમાં દિવસે દવા અને રાત્રે દારુનું વેચાણ કરતો આરોપી ઝડપાયો

ઋત્વિજ સોની, અમદાવાદ : દવા - દારૂ આ શબ્દ આપને અનેક વખત એક સાથે સાંભળ્યો હસે. જ્યારે કોઈ પણ વ્યક્તિ બીમાર પડે છે ત્યારે લોકો તેને દવા દારૂ લેવાની સલાહ આપતા હોય છે. પરંતુ દવા અને દારૂનું સાથે કોઈ વેચાણ કરાતું હોય તેવું ક્યારેય સાંભળ્યું છે. અમદાવાદ (Ahmedabad) શહેરના વસ્ત્રાપુર (Vastrapur) વિસ્તારમાંથી આવા જ બે આરોપીઓની ધરપકડ કરવામાં આવી છે. જેમાં એક આરોપી દિવસે દવા તો રાત્રે દારૂનું વેચાણ કરતો હતો.

મળતી માહિતી પ્રમાણે પોલીસએ (Police) ઇન્દ્રજીત રાજપૂત અને વિજય ઠાકોર નામના વ્યક્તિની ધરપકડ કરીને એક ઇનોવા, એક સિયાઝ કાર અને 31 બોટલ વિદેશી દારૂ (Foreign liquor) જપ્ત કર્યો છે. આરોપીઓ આ દારૂ રાજસ્થાનથી લાવ્યા હોવાનું બહાર આવ્યું છે.

જોકે મહત્વની બાબત તો એ છે કે આરોપી ઇન્દ્રજીત રાજપૂત અસારવામાં શિવમ મેડીકલ નામની મેડીકલ પણ ધરાવે છે. જ્યારે રાજસ્થાનથી દારૂ લાવી ને તે છૂટક વેચાણ કરતો હતો.

જ્યારે પોલીસે દારુ સાથે બે આરોપીની ધરપકડ કરી તપાસ કરી ત્યારે જે ઈનોવા ગાડીમાં દારુ સંતાડવામાં આવતો હતો. તેના માટે રાજસ્થાનના એક લુહાર પાસે ગાડીમાં ચોર ખાનુ બનાવ્યુ હતુ. જેમાં આરોપી રાજસ્થાનથી દારુ અમદાવાદ લાવતો હતો.

છેલ્લા 6 મહિનાથી આરોપી ચોરી છુપે થી દારુ વેચતા હોવાનુ સામે આવતા પોલીસે વધુ તપાસ હાથ ધરી હતી. હાલમાં પોલીસે આ બંને આરોપી ઓની ધરપકડ કરીને વધુ તપાસ શરૂ કરી છે.