હવે ચૂંટણી કાર્ડનું ડિજિટલ વર્ઝન ડાઉનલોડ કરી શકાશે, જાણો ડાઉનલોડ કરવાની રીત

વિભુ પટેલ, અમદાવાદ: મતદાર યાદી (Voter List)માં નામ નોંધાવ્યું છે પરંતુ ચૂંટણી કાર્ડ નથી આવ્યું? જોકે, હવે આ માટે ચિંતા કરવાની જરૂર નથી. હવે તમે આધાર કાર્ડ (Aadhaar Card)ની જેમ વોટર આઈડીનું પણ ડિજિટલ વર્ઝન (Digital Voter ID card) ડાઉનલોડ કરી શકશો. કેન્દ્રીય ચૂંટણી પંચ દ્વારા મતદારો માટે વિશેષ સુવિધા પોર્ટલ પર શરૂ કરવામાં આવ્યું છે. www.nvsp.in પર e-EPIC સુવિધા આપવામાં આવી છે. e-EPIC પરથી મતદારો પોતાનું ડિજિટલ વોટર આઈડી ડાઉનલોડ કરી શકશે. હાલ આ સુવિધા નવા નોંધાયેલ મતદારો માટે શરૂ કરવામાં આવી છે. ધીમે ધીમે આ સુવિધાનો લાભ તમામ મતદારો લઈ શકશે. ઉલ્લેખનીય છે કે હાલ ગુજરાતમાં સ્થાનિક સ્વરાજની ચૂંટણીની જાહેરાત કરવામાં આવી છે.

અમદાવાદ જિલ્લા ચૂંટણી અધિકારી ચેતન ગાંધીએ જણાવ્યું હતુ કે, નવી મતદાર યાદી જાહેર કરવામાં આવી છે. નવી યાદીમાં અમદાવાદ જિલ્લામાંથી 93 હજાર નવા મતદારોનો સમાવેશ થયો છે. આ નવા મતદારોને ચૂંટણી કાર્ડ મળશે, પરંતુ તેઓ તેનું ડિજિટલ વર્ઝન મેળવી શકે છે. આને પણ મતદાનની પ્રક્રિયામાં પુરાવા તરીકે માન્ય રાખવામાં આવશે. જાણો તમે કેવી રીતે ડિજિટલ વર્ઝન મેળવી શકો છો.

સવાલ: e-EPIC શું છે? જવાબ: e-EPIC નૉન એડિટેડ (સુધારો ન કરી શકાય તેવું) સુરક્ષિત પોર્ટેબલ દસ્તાવેજ છે, જેમાં ફોટો, સુરક્ષા ક્યૂઆર કોડ, સીરિયલ નંબર વગેરે અંકિત હોય છે.

સવાલ: ક્યાંથી ડાઉનલોડ કરી શકાય? જવાબ: e-EPICને તમે http://voterportal.eci.gov.in/ અથવા https://nvsp.in/ પરથી ડાઉનલોડ કરી શકો છો. એન્ડ્રોઇડ યૂઝર્સ https://play.google.com/store/apps/details?id=com.eci.citizen પરથી અને iOS યૂઝર્સ https://apps.apple.com/in/app/voter-helpline/id1456535004 પરથી ડાઉનલોડ કરી શકે છે.

સવાલ: e-EPIC માટે કોણ યોગ્ય છે? જવાબ: એ તમામ મતદાતા જેમની પાસે માન્ય ઈપીઆઈસી નંબર હોય.

સવાલ: મોબાઇલમાં e-EPIC માટે શું કરવું પડશે? જવાબ: મતદાન કરવા માટે લાયક થયા બાદ તમારે મતદાર યાદીમાં નામ નોંધાવવું પડશે. નામ નોંધાવતી વખતે તમારે તમારો મોબાઇલ નંબર પણ નોંધાવવો પડશે. વોટર લિસ્ટમાં તમારું નામ આવી ગયા બાદ તેમને ઇ-મેઇલ કે એસએમએસ મોકલવામાં આવશે. જે બાદમાં એક ઓટીપીની મદદથી તમે તમારા મોબાઇલમાં વોટર કાર્ડ ડાઉનલોડ કરી શકો છો.

સવાલ: મેં મારો EPIC નંબર ખોઈ નાખ્યો છે, હું e-EPIC કેવી રીતે ડાઉનલોડ કરું? જવાબ: તમે http://voterportal.eci.gov.in/ અથવા http://electoralsearch.in/ પર જઈને મતદાર યાદીમાં તમારું નામ શોધી શકો છો. જેમાંથી ઈપીઆઈસી નંબર મેળવી લો. જે બાદમાં ઈ-ઈપીઆઈસી ડાઉનલોડ કરી શકો છો.

સવાલ: મારી પાસે e-EPIC નંબર નથી, પરંતુ મારી પાસે ફોર્મ-6 રેફરન્સ નંબર છે, શું હું ઈ-ઈપીઆઈસી ડાઉનલોડ કરી શકું? જવાબ: હા, ઈ-ઈપીઆઈસી ડાઉનલોડ કરવા માટે ફોર્મ-6 રેફરન્સ નંબરનો ઉપયોગ કરી શકો છો.

સવાલ: ઈ-ઈપીઆઈસીનું ફાઇલ ફોર્મેટ શું હોય છે? જવાબ: તમે પીડીએફમાં ઈ-ઈપીઆઈસી ડાઉનલોડ કરી શકો છો.

સવાલ: ઈ-ઈપીઆઈસી ફાઈલની સાઈઝ શું હશે? જવાબ: 250 કેબી

સવાલ: શું મતદાન કેન્દ્ર પર ઓળખપત્ર તરીકે ઈ-ઈપીઆઈસી પ્રિન્ટ કરાવી શકું છું? જવાબ: હા, તમે ડાઉનલોડ અને પ્રિન્ટ કરી શકો છો.

સવાલ: ઈ-ઈપીઆઈસી ડાઉનલોડ કરવા માટે શું કરવું પડશે? જવાબ: તમે ઈ-ઈપીઆઈસીને http://voterportal.eci.gov.in/ અથવા https://nvsp.in/ કે પછી મતદાનતા હેલ્પલાઇન મોબાઇલ એપના માધ્યમથી નીચે આપેલી પ્રક્રિયા અનુસરીને ડાઉનલોડ કરી શકો છો.

મતદાતા પોર્ટલ પર રજિસ્ટર/લૉગીન કરો. મેનુમાં નેવિગેશનમાંથી ડાઉનલોડ ઈ-ઈપીઆઈસી ક્લિક કરો. ઈપીઆઈસી નંબર અથવા ફોર્મ સંદર્ભ સંખ્યા દાખલ કરો. રજિસ્ટર મોબાઇલ નંબર પર એક ઓટીપી આવશે, જેને વેરિફાય કરો. e-EPIC પર ક્લિક કરો. જો મોબાઇલ નંબર Erollમાં નોંધાયેલો નથી તો, KYC માટે e-KYC પર ક્લિક કરો. જે બાદમાં તમામ પ્રક્રિયા પૂર્ણ કરીને ઈ-ઈપીઆઈસી ડાઉનલોડ કરો.

સવાલ: e-KYC શું છે? જવાબ: e-KYC રેન્ડમ બૉડી મૂવમેન્ટ સાથે લાઇવ ચેક છે, જેમાં વ્યક્તિનો લાઇવ ફોટો કેપ્ચર કરીને EPIC ડેટામાં ઉપયોગમાં લેવાયેલા ફોટો સાથે તેની સરખામણી કરવાની હોય છે.

સવાલ: e-KYC નિષ્ફળ રહે તો શું કરવું પડશે? જવાબ: જો આવું થાય તો ERO ઓફિસ જાઓ અને લેટેસ્ટ ફોટો જમા કરાવો. બાદમાં મોબાઇલ નંબર અપડેટ કરો.

સવાલ: e-KYC માટે શું જરૂરી છે? જવાબ: આ માટે કેમેરો અથવા લેપટોપ/વેબ કેમ અથવા મોબાઇલ ફોન/ટેબ્લેટની જરૂર છે.

સવાલ: Erollમાં મારો મોબાઇલ નંબર રજિસ્ટર્ડ નથી, તો શું હું e-EPIC ડાઉનલોડ કરી શકું? જવાબ: હા. પરંતુ આ માટે e-KYC કરવું પડશે. જેનાથી મોબાઇલ નંબર અપડેટ થાય.

સવાલ: ERollમાં નોંધાયેલો નંબર હાલ ઉપયોગમાં નથી. શું હું બીજો નંબર અપડેટ કરી શકું? જવાબ: જવાબ: હા. તમે આવું કરી શકો છો. આ માટે e-KYC જરૂરી છે.

સવાલ: શું સ્માર્ટ ફોન પર e-EPIC ડાઉનલોડ કરી શકાય? જવાબ: હા. તમે વોટર હેલ્પલાઇન મોબાઇલ એપના માધ્યમથી આવું કરી શકો છો.

સવાલ: એક જ મોબાઇલ નંબર પર મારા પરિવારના સભ્યો નોંધાયેલા છે. આવી સ્થિતિમાં e-EPIC કેવી રીતે ડાઉનલોડ કરવું? જવાબ: દરેક નંબરને સિંગલ મોબાઇલ નંબર માટે કેવાયસી કરાવવું પડશે. જે બાદમાં જ e-EPIC ડાઉનલોડ થશે.