Ahmedabad Monsoon: અમદાવાદમાં વીજળીના કડાકા સાથે ધોધમાર વરસાદ, એસજી હાઇવે પર વાવાઝોડું

અમદાવાદ: છેલ્લા કેટલાક દિવસથી અમદાવાદીઓ મેઘરાજાની આતુરતાથી રાહ જોઇ રહ્યા હતા, તેનો આજે અંત આવ્યો છે. હાલમાં અમદાવાદ શહેરના મોટા ભાગના વિસ્તારમાં કડાકાભડાકા સાથે વરસાદ વરસી રહ્યો છે. ત્યાં જ શહેરના કેટલાક વિસ્તારમાં વીજળી અને પવનના સુસવાટા સાથે વરસાદ વરસી રહ્યો છે. આજે બપોર બાદથી જ શહેરના વાતાવરણમાં પલટો આવ્યો હતો અને શહેર પર કાળાડીબાંગ વાદળો છવાઇ ગયા હતા. જે બાદ શહેરના કેટલાક વિસ્તારમાં ઝકરમર વરસાદ શરૂ થયો છે.

હાલમાં અમદાવાદના વાસણા વિસ્તારના રિવરફ્રંટ પર ધોધમાર વરસાદ વરસી રહ્યો છે ત્યાં જ પાલડી વિસ્તારમાં પણ વીજળીના કડાકા સાથે વરસાદ વરસી રહ્યો છે. શહેરના એસજી હાઇવે પર વીજળીના કડાકા સાથે વરસાદ વરસી રહ્યો છે. ત્યાં જ એસજી હાઇવે પર ભારે પવન સાથે વરસાદ શરૂ થતા હાઇવે પરના હોર્ડિંગ્સ તૂટી પડ્યા છે.

શહેરના અનેક વિસ્તારમાં મેઘરાજાએ બેટિંગ શરૂ કરી છે. શહેરના જમાલપુર, બોડકદેવ, થલતેજ, એસજી હાઇવે, રિવરફ્રંટ, જુનાવાડજ તેમજ વસ્ત્રાપુરમાં વરસાદ વરસી રહ્યો છે. શહેરમાં ભારે વરસાદના પગલે રોડ રસ્તા પર પાણી ભરાયા છે તો જાહેર માર્ગો પર ટ્રાફિકજામના દ્રશ્યો પણ સામે આવી રહ્યા છે. 

અમદાવાદીઓ છેલ્લા કેટલાક દિવસોથી ગરમીમાં સેકાઇ રહ્યા હતા. ત્યાં જ આજે સાંજે મેઘરાજાની એન્ટ્રી થતા શહેરીજનો ખુશ થઇ ગયા છે. અને વરસાદ પડતાની સાથે જ શહેરમાં ઠંડક પ્રસરી ગઇ છે. આજે શહેરમાં સાંજે 6 વાગ્યાની આસપાસ પવનના સૂસવાટા સાથે વરસાદ પડતા શહેરીજનો ઘરની બહાર નીકળી વરસાદનો આનંદ માણી રહ્યા છે.

અમદાવાદમાં પવન સાથે વરસાદ શરૂ થયો છે ત્યાં જ શહેરના વાડજ, ઘીકાંટા અને અમદાવાદના પૂર્વ વિસ્તારમાં પવન સાથે ધોધમાર વરસાદ વરસી રહ્યો છે.