સૌરાષ્ટ્ર-કચ્છમાં વીજળીના કડાકા-ભડાકા સાથે ધોધમાર વરસાદ

અમદાવાદ: દ્વારકા જિલ્લામાં ત્રીજા દિવસે પણ કમોસમી વરસાદ પડ્યો છે. ખંભાળિયા તાલુકાના ગ્રામ્ય વિસ્તારોમાં ત્રીજા દિવસે પણ કમોસમી વરસાદથી ચોમાસા જેવો માહોલ છે. ભરઉનાળે ખેતરો પાણીથી તરબોળ થયા છે. ખંભાળિયા તાલુકાના, લાલુકા, ફોટ સહિત અનેક ગામોમાં ખેતરો પાણીથી તરબોળ થયા છે. ચણા, ઘઉં સહિતના પાકો પર કમોસમી વરસાદનું પાણી ફરી વળ્યું છે. ચોમાસામાં જોવા મળતા દ્ર્શ્યો ભરઉનાળે જોવા મળ્યા છે.

કચ્છમાં ચોથા દિવસે પણ વરસાદી માહોલ છવાયો છે. નખત્રાણા-લખપત તાલુકાને જોડતા વિસ્તારમાં વરસાદ પડ્યો છે. નેત્રા, માતાનામઢ, રવાપર વિસ્તારમાં વરસાદ પડ્યો છે. અહીં વીજળીના કડકા-ભડાકા સાથે વરસાદી માહોલ છવાયો છે.

પોરબંદરના બરડા પંથકમાં આજે પણ વરસાદ વરસ્યો છે. સીમર ગામમાં વરસાદી માહોલ જોવા મળી રહ્યો છે. અહીં તેજ પવન સાથે ધોધમાર વરસાદ પડતાં ચારે તરફ પાણી જ પાણી જોવા મળી રહ્યો છે. અહીં ચોમાસા જેવો માહોલ સર્જાયો છે.

રાજકોટના ઉપલેટના સેવંત્રા સહિતના વિસ્તારમાં વરસાદ પડ્યો છે. સતત વરસી રહેલા વરસાદે ખેડૂતોની ચિંતા વધારી છે. ઘઉં, જીરુ, ચણા, ડૂંગળીના પાકને નુક્સાનની ભીતિ છે. ઘઉંના તૈયાર પાકમાં નુક્સાનની ભીતિ છે.

ગુજરાતમાં ભરઉનાળે માવઠું થઇ રહ્યું છે. માવઠાને લીધે ખેડૂતોને ભારે નુકસાન સહન કરવાનો વારો આવ્યો છે, જ્યારે બેવડી ઋતુને લીધે રોગચાળો પણ જોવા મળી રહ્યો છે. આવામાં આગામી પાંચ દિવસને લઇને હવામાન વિભાગની આગાહી સામે આવી છે. જેમાં આગામી ચાર દિવસ વરસાદ રહેવાની સંભાવના હવામાન વિભાગ દ્વારા વ્યક્ત કરવામાં આવી છે.