સુરતના વાતાવરણમાં પલટો, અનેક વિસ્તારમાં કમોસમી વરસાદ; હજુ આ જિલ્લામાં વરસાદની આગાહી

સુરતઃ હવામાન વિભાગે વરસાદની આગાહી કરી હતી. ત્યારે બપોર બાદ સાંજે અચાનક વાતાવરણમાં પલટો જોવા મળ્યો હતો. બપોર બાદ જિલ્લાના કેટલાક વિસ્તારમાં કમોસમી વરસાદ ખાબક્યો હતો.

સુરતના ઓલપાડમાં ગાજવીજ સાથે મેઘરાજાએ ધમાકેદાર એન્ટ્રી કરી હતી. આ ઉપરાંત કેટલાક વિસ્તારમાં જોરદાર પવન પણ ફૂંકાતો હતો. કમોસમી વરસાદને કારણે દક્ષિણ ગુજરાતના ખેડૂતોને ફટકો પડી શકે તેવી શક્યતા છે.

ત્યારે આગામી પાંચ દિવસ સુધી દક્ષિણ ગુજરાતમાં છૂટાછવાયા કમોસમી વરસાદી ઝાપટા પડે તેવી આગાહી કરવામાં આવી છે. ત્યારે આવા વાતાવરણને કારણે ખેડૂતોમાં ચિંતાનો માહોલ છવાઈ ગયો છે.

તો બીજી તરફ, ગુજરાતના હવામાન વિભાગે આગામી પાંચ દિવસ સુધી ગુજરાતમાં કમોસમી વરસાદ પડે તેવી આગાહી કરી છે. સૌરાષ્ટ્ર-કચ્છમાં આગામી 15, 16 અને 17 માર્ચે હળવાથી મધ્યમ વરસાદની આગાહી કરવામાં આવી છે. ઉલ્લેખનીય છે કે, વેસ્ટર્ન ડિસ્ટર્બન્સને કારણે વરસાદી ઝાપટા આવે તેવી શક્યતા છે.

દક્ષિણ ગુજરાતના વલસાડ, નવસારી અને ડાંગ જિલ્લામાં હળવો વરસાદ પડે તેવી શક્યતા છે. તો 16મી માર્ચે પણ આ જિલ્લામાં છૂટોછવાયો મધ્યમથી હળવો વરસાદ થાય તેવી શક્યતા છે.

મધ્ય ગુજરાતની વાત કરીએ તો, અમદાવાદમાં આજે અને આવતીકાલે વાદળછાયું વાતાવરણ રહેશે. હાલ અમદાવાદનું તાપમાન 37 ડિગ્રી રહી શકે છે. તો બીજી તરફ, માછીમારો માટે કોઈ આગાહી કરવામાં આવી નથી.

આ ઉપરાંત હવામાન વિભાગે ખેડૂતોને સલાહ આપતા જણાવ્યું છે કે, જેમના પાક થઈ ચૂક્યા છે તેઓ ઝડપથી પાક ઉતારી લે. આગામી બે દિવસ સુધી તાપમાનનો પારો 2-3 ડિગ્રી ઘટશે.