Gujarat Weather Update: રાજ્યમાંથી માવઠું લેશે વિદાય? જાણો હવામાન વિભાગની આજની આગાહી

અમદાવાદ: રાજ્યમાં હાલ વાતાવરણમાં રોજ પલટા આવી રહ્યા છે. ત્યારે આજે હવામાન વિભાગે આજે એક આગાહી કરી છે. જેમાં તેમણે જણાવ્યુ છે કે, આગામી 24 કલાક સામાન્ય કમોસમી વરસાદ શક્યતા છે. જે બાદ ગરમીમાં ધીરે ધીરે વધારો થશે. જોકે, રાજ્યમાં હાલ થોડા દિવસ માવઠું કે કરા પડવાની શક્યતા નથી.

અમદાવાદ, હવામાન વિભાગના ડાયરેક્ટર મનોરમા મોહન્તીએ રાજ્યના હવામાન અંગે આગાહી કરતા જણાવ્યુ કે. આગામી 24 કલાક કેટલાક વિસ્તારોમાં કમોસમી વરસાદ થવાની આગાહી છે. જે બાદ ધીરે ધીરે ગરમીમાં વધારો થઇ શકે છે. દક્ષિણ ગુજરાતનાં વલસાડ, નવસારીના વિસ્તારોમાં સામાન્ય કમોસમી વરસાદની શકયતા છે. આ ઉપરાંત તેમણે વધુમાં જણાવ્યુ કે, અન્ય શહેરોમાં વાદળછાયું વાતાવરણ રહેશે પરંતુ વરસાદ નહીં થાય. પરંતુ 24 કલાક બાદ તાપમાનમાં બેથી ત્રણ ડિગ્રીનો વધારો નોંધાશે. જે બાદ બે દિવસ આવું જ વાતાવરણ રહેવાની શક્યતા છે.

મનોરમા મોહન્તીએ વધુમાં જણાવ્યુ કે, આજ સાંજ સુધી મોટાભાગના વિસ્તારોમાંથી વાદળો હટી જશે. જે બાદ ધીરે ધીરે તાપમાન વધશે. જે બાદ તાપમાનમાં હાલ કોઇ બદલાવ નહીં આવે.

હવામાન વિભાગની આગાહી પ્રમાણે, અમદાવાદ, વડોદરા, સુરત, રાજકોટ, દ્વારકા, ભુજ, ડિસા, વેરાવળમાં આકાશ ચોખ્ખું જ રહેશે. અહીં વાદળછાયા વાતાવરણની કે વરસાદની આગાહી નથી.

તો બીજી તરફ હવામાન નિષ્ણાત અંબાલાલ પટેલે એપ્રિલમાં કમોસમી વરસાદની આગાહી વ્યક્ત કરી છે. જેમા તેમણે જણાવ્યું છે કે, 3 એપ્રિલથી ઉનાળાની સાથે રાજ્યના કેટલાક ભાગોમાં વરસાદ પડવાની આગાહી કરીને અંબાલાલ પટેલે જણાવ્યું છે કે, તારીખ 3-8 અને 10 દરમિયાન ગુજરાતમાં વાદળો ફરી આવવાની શક્યતા છે. 14 તારીખ સુધીમાં ફરીથી આંધી, વંટોળ અને ગરમી સાથે કેટલાક ભાગોમાં વરસાદ થવાની શક્યતાઓ રહેશે. કરા પડવાની પણ શક્યતા છે.

અંબાલાલ પટેલે અખાત્રીજ વખતે પણ હવામાનમાં પલટો આવવાની શક્યતા વ્યક્ત કરીને જણાવ્યું છે કે, આ પલટાઓ છે તે ચાલુ જ રહેશે. મે મહિનામાં 8મીએ આંધી-વંટોળ આવશે, જેનાથી બાગાયતી પાકને નુકસાન થઈ શકે છે. આમ છતાં આ વખતે ગરમી વધારે પડવાની સંભાવના અંબાલાલ પટેલ વ્યક્ત કરી રહ્યા છે.