ફરી માવઠાની આફત: 4 અને 5 એપ્રિલે માવઠાની આગાહી; ત્રણ દિવસ ગરમીનો પ્રકોપ રહેશે

વિભુ પટેલ, અમદાવાદ: રાજ્યમાં ઉનાળાની સિઝનમાં ચોમાસુ ચાલુ હોય તેવો અહેસાસ થઇ રહ્યો છે. માર્ચ મહિનામાં 4 વખત માવઠું થયું હતું. હવે એપ્રિલ મહિનાની શરૂઆત પણ માવઠાથી થાય તેવી આગાહી સામે આવી છે. એપ્રિલ મહિનાની શરૂઆતમાં જ એટલે કે 4 અને 5 એપ્રિલે કમોસમી વરસાદ પડી શકે છે. 31 માર્ચે બાદ હવે નવા મહિનાની શરૂઆતે જ વધુ એક માવઠાની આગાહીએ ખેડૂતોની ચિંતા વધારી છે. હવામાન વિભાગનની આગાહી ખેડૂતો માટે વધુ એક ચિંતાજનક સમાચાર છે. આગાહી કરવામાં આવી છે કે, રાજ્યના અમુક ભાગમાં એપ્રિલના પહેલા જ સપ્તાહમાં માવઠું થશે.

હવામાન વિભાગ દ્વારા આગાહી કરવામાં આવી છે કે, આગામી 3 દિવસમાં મહત્તમ તાપમાન 2થી 3 ડિગ્રી વધી જશે. પરંતુ ફરી એક વેસ્ટર્ન ડિસ્ટર્બન્સ આવશે. જેના કારણે કમોસમી વરસાદની શક્યતા રહેશે. 4 અને 5 એપ્રિલે કમોસમી વરસાદ શક્યતા છે. ખાસ કરીને 4 એપ્રિલે કચ્છમાં થન્ડર સ્ટ્રોમ એક્ટિવિટી સાથે વરસાદની શક્યતા છે.

5 એપ્રિલે બનાસકાંઠા, સાબરકાંઠા, અને કચ્છમાં થંડર સ્ટોમ એક્ટિવિટી સાથે કમોસમી વરસાદની શક્યતા છે. જ્યારે અન્ય જિલ્લમાં વાતાવરણ સુકુ રહેશે.

રાજ્યમાં વેસ્ટન ડિસ્ટર્બન્સી અસર ઓછી થતા મહત્તમ તામપાન વધી રહ્યું છે. માવઠાથી છૂટકારો મળ્યો છે પરંતુ હવે ગરમીનું પ્રમાણ વધશે. રાજ્યમાં અત્યારે ઉત્તર પશ્ચિમના પવન ફૂંકાય રહ્યા છે. આવામાં 2થી 3 ડિગ્રી તાપમાન વધવાની શક્યતા છે.

એપ્રિલમાં મહત્તમ તાપમાન 37થી 39 ડિગ્રી અસપાસ તાપમાન પહોંચી જતું હોય છે. પરંતુ ચાલુ વર્ષે કમોસમી વરસાદના કારણે માર્ચ મહિનામાં પણ મહત્તમ તાપમાન સામાન્ય કરતા પણ નીચું રહ્યું છે. અત્યારે પણ મોટા ભાગના શહેરનું તાપમાન 33થી 35 ડિગ્રી વચ્ચે નોંધાયું છે. જે સામાન્ય તાપમાન કરતા પણ 4થી 5 ડિગ્રી નીચું તાપમાન છે. જોકે, આજે અમદાવાદ શહેરનું મહત્તમ તાપમાન 35 ડિગ્રી રહેવાની શક્યતા છે.