ફરી ગરમ કપડામાં લપેટાયા લોકો, રાજ્યમાં પારો ગગડતાં કડકડતી ઠંડી; આબુમાં -3 ડિગ્રી

અમદાવાદ: નાનકડા વિરામ બાદ ફરી ઠંડીનો જોર વધી રહ્યો છે. રાજ્યમાં ઠંડીનો વધુ એક રાઉન્ડ શરૂ થઇ ગયો છે. સૂસવાટા મારતાં પવન સાથે ફરી એક વખત ઠંડીનો ચમકારો અનુભવાઇ રહ્યો છે. રાજ્યના કેટલાક શહેરોમાં પારો 11 ડિગ્રીની નીચે નોંધાયો છે. જ્યારે હવામાન વિભાગની આગાહી અનુસાર આગામી 3-4 દિવસ લધુત્તમ તાપમાનમાં ફેરફાર થવાની શક્યતા લગભગ નહીવત મનાય છે. એટલે કે, આ દરમિયાન ઠંડીનો ચમકારો થયાવત જોવા મળી શકે છે.

ગતરાત્રે રાજ્યમાં સૌથી નીચું તાપમાન નલિયા નહીં, પરંતુ દાહોદમાં નોંધાયું હતું. દાહોદમાં 8.8 ડિગ્રી તાપમાન નોંધાયું હતું. જ્યારે નલિયા અને ગાંધીનગરમાં 9.8 ડિગ્રી લધુત્તમ તાપમાન નોંધાયું હતું. નલિયામાં 9.8 ડિગ્રી સાથે સરેરાશ લધુત્તમ તાપમાનમાં સામાન્ય કરતાં પાંચ ડિગ્રીનો ઘટાડો નોંધાયો હતો.

અમદાવાદમાં લધુત્તમ તાપમાનમાં એક ડિગ્રીના ઘટાડો જોવા મળ્યો છે. આ સાથે જ શહેરનું તાપમાન 10.8 ડિગ્રી નોંધાયું હતું. આગામી ત્રણ દિવસ અમદાવાદમાં 9થી 11 ડિગ્રી ઠંડી રહેવાની આગાહી કરવામાં આવી છે. આ ઉપરાંત રાજ્યના 9 શહેરોમાં સરેરાશ લધુત્તમ તાપમાન 11 ડિગ્રીથી નીચે નોંધાયું હતું.

દાહોદમાં 8.8. નલિયામાં 9.8, ગાંધીનગરમાં 9.8, અમદાવાદમાં 10.8, રાજકોટમાં 11.2, વડોદરામાં 14, સુરતમાં 15.6, ભાવનગરમાં 14.1, જૂનાગઢમાં 17.4, પોરબંધરમાં 13.0, ડીસમાં 11.1, ભૂજમાં 10.7, અમરેલીમાં 10.4, પાટણમાં 10.1 ડિગ્રી તાપમાન નોંધાયું હતું.

હિલ સ્ટેશન માઉન્ટ આબુમાં ફરી તાપમાનનો પારો નીચે ગયો હતો. લઘુત્તમ તાપમાનમાં 3 ડિગ્રીનો ઘટાડો નોંધાયો હતો. રવિવારે લઘુત્તમ તાપમાન માઈનસ -3 ડિગ્રી સેલ્સિયસ નોંધાયું છે. વાહનોના વિન્ડશિલ્ડ અને ઘાસના મેદાનો સહિત અન્ય સ્થળો પર બરફ જામી ગયો છે. કડકડતી ઠંડીએ ફરી એકવાર તેનું ઉગ્ર સ્વરૂપ બતાવ્યું છે. બીજી બાજુ, હિલ સ્ટેશન માઉન્ટ આબુમાં પ્રવાસીઓ ઠંડીની મજા માણી રહ્યા છે.