Gujarat weather update: ગુજરાતમાં ગરમીનો વધ્યો પારો, જાણો ક્યારે ફરીથી પલટાશે વાતાવરણ

અમદાવાદ: રાજ્યમાં કડકડતી ઠંડીમાં ઘટાડો થયો છે. હવે થોડા દિવસથી બપોરના સમયમાં તાપમાન ઊંચુ રહે છે. જ્યારે રાતે ઠંડીનો અનુભવ થઇ રહ્યો છે. ત્યારે હવામાન વિભાગની આગાહી પ્રમાણે, હજી બેથી ત્રણ દિવસ રાજ્યનું વાતાવરણ આવું જ રહેશે. લઘુત્તમ અને મહત્તમ તાપમાનમમાં કંઇ મોટો ઘટાડો થવાની શક્યતા છે.

રાજ્યમાં તાપમાનના પારામાં વધારો થયો છે. વેસ્ટર્ન ડિસ્ટર્બન્સની અસર હેઠળ ઠંડીમાં ઘટાડો થયો છે. તેમજ તમામ શહેરોમાં તાપમાનનો પારો વધ્યો છે. તેમાં અમદાવાદમાં તાપમાન 15 ડિગ્રીથી વધુ રહ્યું છે. તેમજ કેટલાક વિસ્તારમાં વાદળછાયુ વાતાવરણ રહેવાની શક્યતા પણ સેવવામાં આવી છે.

રાજ્યમાં તાપમાનનો પારો ઊંચો ગયો છે. રાજ્યના લગભગ વિસ્તારમાં તાપમાન ઊંચુ નોંધાયું છે. તેમજ અમદાવાદ, વડોદરા, દ્વારકામાં વાદળછાયું વાતાવરણ રહી શકે છે. તો નલિયામાં હળવો પવન રહેશે. તેમજ અમદાવાદમાં તાપમાન 15 ડિગ્રી, બરોડામાં 16 ડિગ્રીની આસપાસ રહી શકે છે. દ્વારકામાં 18.6 ડિગ્રી તો નલિયામાં 17 ડિગ્રી તાપમાન રહેશે.

હવામાન વિભાગના વડા મનોરમા મોહંતીએ રાજ્યમાં ઠંડીની આગાહી કરતા જણાવ્યું છે કે, "ગુજરાતમાં આગામી ત્રણ દિવસ હવામાન સૂકું રહેવાની આગાહી છે. રાજ્યમાં વરસાદ થવાની સંભાવના નથી. લઘુત્તમ અને મહત્તમ તાપમાનમાં કંઈ મોટો ઘટાડો થવાની સંભાવના નથી. પરંતુ તાપમાન 2-3 ડિગ્રીનો વધારો થઈ શકે છે. હાલ જે સમય ચાલી રહ્યો છે તેમાં લઘુત્તમ તાપમાનમાં વધારો થશે, રાત્રી દરમિયાન પડતી ઠંડીમાં આગામી ત્રણ દિવસમાં ઘટાડો થતો જશે."

તેમણે વધુમાં જણાવ્યુ કે, હાલ એક વેસ્ટર્ન ડિસ્ટર્બન્સનો અપ્રોચ થઈ રહ્યો છે, પરંતુ તેની ગુજરાત પર ખાસ અસર નહીં રહે પરંતુ તેના કારણે ભેજ વધશે અને ઠંડીમાં ઘટાડો થશે. રાજ્યમાં કેટલીક જગ્યા પર તાપમાનમાં એકાદ ડિગ્રીનો ઘટાડો થઈ શકે છે આ સિવાય કોઈ મોટા ફેરફારની સંભાવના નથી.

હવામાન વિભાગે ઠંડી અંગે આગાહી કરતા જણાવ્યુ કે, ઠંડીનું પ્રમાણ ફેબ્રુઆરી સુધી રહેશે અને માર્ચથી તાપમાનમાં વધારો થવાની આગાહી વ્યક્ત કરવામાં આવી છે. ફેબ્રુઆરીના અંતિમ ભાગથી ઠંડીનું પ્રમાણ ઘટતું જશે અને ગરમીનું જોર વધવાનું શરુ થશે.

હવામાન નિષ્ણાત અંબાલાલ પટેલે પણ આગાહી કરતા જણાવ્યુ હતુ કે, હવે ધીમે-ધીમે રાજ્યમાં ઠંડીના જોરમાં ઘટાડો થવાની આગાહી કરી છે. જેમાં તેમણે માર્ચ સુધીમાં મહત્તમ તાપમાનનો પારો 40 ડિગ્રીએ પહોંચી જવાની સંભાવના વ્યક્ત કરી છે. ફેબ્રુઆરીના બીજા સપ્તાહથી ગરમી જોર પકડશે અને મહત્તમ તાપમાન 36 ડિગ્રી આસપાસ પહોંચી જશે. આ પછી 19 થી 20 ફેબ્રુઆરીએ મહત્તમ તાપમાન વધતું જશે. અને ફેબ્રુઆરીના અંત સુધીમાં મહત્તમ તાપમાન 38 ડિગ્રી થઈ થવાની શકયતા રહેશે.