Gujarat Weather Forecast: રાત્રે ઠુંઠવાતી ઠંડીનું જોર યથાવત, નજીકના સમયમાં પારો 40 ડિગ્રીને સ્પર્શ કરશે

અમદાવાદઃ રાત્રે તથા વહેલી સવારે કાતિલ ઠંડી યથાવત, બહુ જલદી ગરમી આકરું સ્વરૂપ ધારણ કરશે તેવી સંભાવના વ્યક્ત કરવામાં આવી રહી છે. નલિયામાં રાજ્યનું સૌથી ઓછું 4 ડિગ્રી તાપમાન ગુરુવારે નોંધાયું હતું. આ સાથે અમદાવાદ અને ગાંધીનગરમાં પણ લઘુત્તમ તાપમાન 15થી ઓછું નોંધાયું હતું. ફેબ્રુઆરીના અંત સુધીમાં મહત્તમ તાપમાનનો પારો 40ની નજીક પહોંચવાની સંભાવના વ્યક્ત કરવામાં આવી રહી છે. અંબાલાલ પટેલે પણ માર્ચ મહિનામાં લઘુત્તમ તાપમાન 40 ડિગ્રીએ પહોંચશે તેવી આગાહી કરી છે.

રાજ્યમાં રાત્રીના સમયે બરફીલી ઠંડી અનુભવાઈ રહી છે, જોકે, મહત્તમ તાપમાનનો આંકડો પણ ઊંચો જઈ રહ્યો છે. રાજ્યના સુરત, વલસાડ, વેરાવળમાં મહત્તમ તાપમાન 30 ડિગ્રીને પાર કરીને 31 ડિગ્રી સેલ્સિયસ નોંધાયું છે.

2 ફેબ્રુઆરીએ નલિયા રાજ્યનું સૌથી ઠંડું શહેર રહ્યું હતું. અહીં લઘુત્તમ તાપમાન ફરી એકવાર ગગડીને 4 ડિગ્રીએ પહોંચ્યું હતું. આ સિવાય કંડલા (એરપોર્ટ)નું લઘુત્તમ તાપમાન 10ની અંદર નોંધાયું હતું. ગાંધીનગ, ભૂજ, ડીસામાં લઘુત્તમ તાપમાન 11 ડિગ્રી નોંધાયું હતું.

અંબાલાલ પટેલે હવે ધીમે-ધીમે રાજ્યમાં ઠંડીના જોરમાં ઘટાડો થવાની આગાહી કરી છે. જેમાં તેમણે માર્ચ સુધીમાં મહત્તમ તાપમાનનો પારો 40 ડિગ્રીએ પહોંચી જવાની સંભાવના વ્યક્ત કરી છે. ફેબ્રુઆરીના બીજા સપ્તાહથી ગરમી જોર પકડશે અને મહત્તમ તાપમાન 36 ડિગ્રી આસપાસ પહોંચી જશે.આ પછી 19 થી 20 ફેબ્રુઆરીએ મહત્તમ તાપમાન વધતું જશે. અને ફેબ્રુઆરીના અંત સુધીમાં મહત્તમ તાપમાન 38 ડિગ્રી થઈ થવાની શકયતા રહેશે.

આ તરફ રાજસ્થાનના હિલ સ્ટેશન માઉન્ટ આબુમાં કડાકા સાથે ઠંડી પડી રહી છે. લઘુત્તમ તાપમાન અહીં માઈનસમાં નોંધાતા ફરી એકવાર ઘાસના મેદાનો અને વાહનો પર બરફ જામેલો જોવા મળ્યો હતો. જોકે, બપોર પછી થોડા સમય માટે અહીં ઠંડીના જોરમાં ઘટાડો જોવા મળ્યો હતો.

જે પ્રકારે માઉન્ટ આબુમાં ઠંડી પડી રહી છે તેનાથી નજીકના સમયમાં રાહત મળવાની સંભાવના દેખાઈ રહી નથી. જોકે, અહીં પણ ફેબ્રુઆરીનો અંત આવતા-આવતા મહત્તમ તાપમાનમાં વધારો થવાથી ઠંડીના આકરા જોરમાં ઘટાડો થતો જશે તેવી સંભાવના વ્યક્ત કરાઈ રહી છે.

શુક્રવારે માઉન્ટ આબુમાં તાપમાન માઈનસમાં નોંધાયું હતું. ઠંડીનું પ્રમાણ અહીં વધુ હોવાથી લોકો ઠંડીથી બચવાના પ્રયાસ કરતા નજરે પડી રહ્યા છે. સવારમાં વધારે ઠંડી હોવાના કારણે સામાન્ય જનજીવન અને ધંધા-રોજગારની મોડી શરુઆત થઈ રહી છે. આ સાથે સાંજે પણ બજારોમાં બેસીને ધંધો કરનારા મોડી સાંજ સુધી બેસવાનું ટાળી રહ્યા છે.