ગુજરાતમાં ફરીથી માવઠું થશે? જાણો શું કહે છે હવામાન વિભાગની આગાહી

અમદાવાદ: રાજ્યમાં કાળઝાળ ગરમી પડી રહી છે. ત્યારે આજના દિવસમાં વાતાવરણમાં પલટો આવવાની આગાહી કરવામાં આવી છે. પશ્ચિમ દિશા તરફથી પવન ફૂંકાઇ રહ્યો છે ત્યારે ભેજનું પ્રમાણ વધી રહ્યું છે. હવામાન વિભાગની આગાહી પ્રમાણે રાજ્યના કેટલાક વિસ્તારમાં વાદળ છાયું વાતાવરણ રહેવાની શક્યતા છે. આગામી પાંચ દિવસમાં વરસાદ થવાની સંભાવના નહિવત છે. જોકે, રાજ્યના વાતાવરણમાં પલટો આવશે અને વાદળછાયું વાતાવરણ રહેશે. જેના કારણે મહત્ત્મ તાપમાનમાં ઘટાડો થવાની શક્યતા છે.

ગુજરાતના હવામાન વિભાગના ડાયરેક્ટર ડો. મનોરમા મોહન્તીએ જણાવતા કહ્યુ કે,આગામી પાંચ દિવસમાં વરસાદ થવાની સંભાવના નહિવત છે. જોકે, રાજ્યના વાતાવરણમાં પલટો આવશે અને વાદળછાયું વાતાવરણ રહેશે. મહત્ત્મ તાપમાનમાં ઘટાડો થવાની શક્યતા છે. રાજ્યમાં અનેક વિસ્તારોમાં બેથી ચાર ડિગ્રી તાપમાન ઘટવાની શક્યતા છે. જેના કારણે કાળઝાળ ગરમીમાં રાહત મળી શકે છે.

મનોરમા મોહન્તીએ જણાવ્યુ કે, રાજ્યની સાથે અમદાવાદ અને ગાંધીનગરમાં પણ તાપમાનમાં ઘટાડો થવાની શક્યતા છે. અમદાવાદમાં આવતી કાલથી તાપમાનમાં બેથી ચાર ડિગ્રીમાં ઘટાડો થવાની શક્યતા છે. હાલ અરબ સાગરથી મજબૂત પવન રાજ્ય પર ફૂંકાઇ રહ્યો છે. જેથી તાપમાનમાં વધારો નહીં થાય પણ ગરમીનો પારો ઘટવાની આગાહી કરવામાં આવી છે.

માછીમારોને આખા ગુજરાતમાં ન જવાનું જણાવી દેવામાં આવ્યું છે. ગુજરાતના કેટલાક વિસ્તારોમાં 40 કિમીની આસપાસ પવન ફૂંકાવાવની સંભાવના છે.

જ્યારે હવામાન નિષ્ણાત અંબાલાલ પટેલ દ્વારા ફરી એકવાર રાજ્યમાં ચોમાસા જેવો કમોસમી વરસાદ થવાની આગાહી કરી છે. ભારે વરસાદની સંભાવના તેમના દ્વારા ચાલુ મહિનાના અંતમાં થવાની શક્યતાઓ વ્યક્ત કરવામાં આવી છે. અંબાલાલ પટેલે રાજ્યના ઘણાં ભાગોમાં વરસાદ થવાની શક્યતાઓ વ્યક્ત કરી છે. જેમાં ઉત્તર, મધ્ય અને દક્ષિણ ગુજરાત તથા સૌરાષ્ટ્રના ભાગોનો સમાવેશ થાય છે.

અંબાલાલ પટેલે વરસાદ અંગે આગાહી કરતા જણાવ્યું છે કે, ગુજરાતમાં 25, 26, 27, 28 અને 29 તારીખે ભારે વરસાદ થવાની શક્યતાઓ છે.