Gujarat weather update: ગુજરાતમાં આગામી સપ્તાહમાં કેવું રહેશે હવામાન, જાણો ઠંડી વધશે કે ઘટશે?

અમદાવાદ: રાજ્યમાં બે દિવસથી ઠંડા પવન અને ઠંડીમાંથી રાહત મળી છે. ત્યારે ગુજરાતીઓ પણ રાહતનો શ્વાસ લઇ રહ્યા છે. રાજ્યનાં મોટાભાગનાં વિસ્તારોમાં તાપમાનનો પારો ઉંચકાયો છે જેના કારણે ઠંડીનો અનુભવ ઓછો થઇ રહ્યો છે. ત્યારે હવામાન વિભાગની આગાહી પ્રમાણે, રાજ્યમાં ચારથી પાંચ દિવસ તાપમાન ઘટવાની સંભાવના નહિવત છે. શનિવારે રાજ્યમાં 9.5 ડિગ્રી સાથે નલિયામાં સૌથી વધુ ઠંડી નોંધાઈ છે.

તાપમાનનાં આંકડા જોતા અમદાવાદ સહિત રાજ્યના મોટાભાગના શહેરોમાં તાપમાનનો પારો 6 ડિગ્રી કરતાં વધુ ઉપર ગયો છે. જેના કારણે લોકોને કડકડતી ઠંડીથી રાહત મળી છે. બે દિવસથી અચાનક જ ઠંડીનું જોર અને પવન ફૂંકાવાનો ઓછો થઈ ગયો છે. જેના કારણે દિવસનું મહત્તમ તાપમાન વધ્યું છે.

હવામાન વિભાગના આંકડા મુજબ, વેસ્ટર્ન ડિસ્ટર્બન્સની અસરથી અમદાવાદમાં છેલ્લા બે દિવસ દરમિયાન લઘુતમ તાપમાન 10 ડિગ્રીથી 6 ડિગ્રી વધી 16.2 અને મહત્તમ તાપમાન 5 ડિગ્રી વધ્યું છે. રાજ્યમાં 9.5 ડિગ્રી સાથે નલિયામાં સૌથી વધુ ઠંડી નોંધાઈ છે.

તાપમાનનાં આંકડા તપાસીએ તો, રાજ્યમાં સૌથી ઓછું તાપમાન નલિયામાં 9.5 ડિગ્રી નોંધાયું છે. આ ઉપરાંત અમદાવાદમાં લઘુત્તમ તાપમાન 16.2 ડિગ્રી, ગાંધીનગરમાં 15.3, ડીસામાં 14.1, સુરતમાં 20.2 અને રાજકોટમાં 17.8 ડિગ્રી તાપમાન નોંધાયુ હતુ.

અમદાવાદની વાત કરીએ તો, મહત્તમ તાપમાન 28.4 ડિગ્રી નોંધાયુ છે. જે હાલની સ્થિતિનાં સામાન્ય તાપમાનની સરખાણીએ 0.4 ડિગ્રી વધુ નોંધાયુ છે. આ સાથે લઘુત્તમ તાપમાન 3.4 ડિગ્રી વધુ નોંધાયું છે. શનિવારે રાજ્યનાં 10થી વધુ શહેરોમાં લઘુત્તમ તાપમાન 15 ડિગ્રીથી વધુ નોંધાયુ હતું.

દેશના હવામાનની વાત કરીએ તો, છેલ્લા થોડા દિવસથી દિલ્હી સહિત સમગ્ર ઉત્તર ભારતમાં અસામાન્ય ઠંડી પડી રહી છે. તેમાં ઠંડા પવનોએ વધારો કર્યો છે. ભારતીય હવામાન વિભાગનાં જણાવ્યા પ્રમાણે, ઠંડીનો આ રાઉન્ડ 11 જાન્યુઆરી સુધી ચાલુ રહેશે. દિલ્હી, પંજાબ, હરિયાણા અને ઉત્તર પ્રદેશમાં ગાઢ ધુમ્મસ છવાયેલું રહેશે. કાનપુર અને અયોધ્યા ઠંડાગાર બની રહેશે.

દિલ્હીમાં શનિવારે મોડી રાત્રે આર્યનગરનમાં પારો 1.5 જેટલો નીચો ઉતરી ગયો હતો. હજી આગામી ત્રણથી ચાર દિવસ તો કડાકાની ઠંડી પડી રહેવા સંભવ છે. ગાઢ ધુમ્મસને લીધે વિઝિબીલિટી પણ ઘટી ગઈ છે અનેક ફ્લાઇટ રદ થઈ છે. જેના કારણે પ્રવાસીઓે હાલાકી ભોગવવાનો વારો આવ્યો છે.