Gujarat Weather forecast: ઉત્તર પશ્ચિમનાં પવન ફૂંકાતા ગુજરાતમાં ઠંડીનું જોર વધશે કે ઘટશે? જાણો આગાહી

અમદાવાદ: રાજ્યમાં ધીરે ધીરે ઠંડીનું પ્રમાણ વધી રહ્યુ છે. ત્યારે હવામાન વિભાગે મોટી આગાહી કરી છે કે, 24 કલાક બાદ પવનની દિશા બદલાવવાની છે. જેના કારણે બે ડિગ્રી તાપમાનમાં વધારો થઇ શકે છે એટલે ઠંડીમાં ઘટાડો થશે.

હવામાન વિભાગની આગાહી પ્રમાણે રાજ્યમાં ઉત્તર પશ્ચિમના પવન ફૂંકાયા છે. હવામાન સુકૂં રહેશે. આગામી 24 કલાકમાં તાપમાન યથાવત રહેશે. નલિયાનું લઘુત્તમ તાપમાન શુક્રવારે બે ડિગ્રી તાપમાનમાં વધારો થશે. નોંધનીય છે કે, નલિયાનું લઘુત્તમ તાપમાન 10.1 ડિગ્રી નોંધાયું હતુ.

શુક્રવારે અમદાવાદ સહિત રાજ્યના 11 શહેરોમાં ઠંડીનો પારો 15 ડિગ્રીથી નીચે નોંધાયો છે. મહત્તમ તાપમાનમાં મોટો ફેરફાર થયો નથી. ડિસેમ્બરમાં શહેરમાં ઠંડીનો પારો 12 ડિગ્રીએ પહોંચી શકે છે.

અંબાલાલ પટેલ દ્વારા આગાહી કરવામાં આવી છે કે, દેશના ઉત્તરીય પ્રદેશોમાં ભારે હિમવર્ષા થવાની સંભાવના છે જેના લીધે તારીખ 22 ડિસેમ્બર પછી ગાત્રો થીજવતી ઠંડી પડવાની શક્યતા છે. દેશમાં ભારે હિમવર્ષા થવાની શક્યતા છે. જેના કારણે ઠંડી વધવાની શક્યતા વધુ છે. તેમણે ભારે હિમવર્ષાના કારણે ઠંડી વધુ રહેવાની પણ આગાહી કરી છે.

ઉત્તર અને ઉત્તર પશ્ચિમ દિશામાંથી આવતા ઠંડા પવનને કારણે ઉત્તર પશ્ચિમ, મધ્ય અને પૂર્વ ભારતના મોટા ભાગોમાં ઠંડી ચમકી છે. હવામાનમાં આવેલા બદલાવ વચ્ચે રાજધાની દિલ્હી પર્વતોની રાણી મસૂરી સહિત અન્ય ઠંડા વિસ્તારો કરતાં વધુ ઠંડુ રહ્યું હતું.

રાજસ્થાનના ઘણા ભાગોમાં ઠંડીનું મોજું ચાલી રહ્યું છે. સૌથી ઓછું તાપમાન સીકરના ફતેહપુરમાં 2.4 ડિગ્રી નોંધાયું હતું. હવામાન વિભાગના જણાવ્યા અનુસાર રાજસ્થાનના 10 શહેરોમાં ઠંડીની સૌથી વધુ અસર જોવા મળી છે. ધુમ્મસ અને ઝાકળએ પણ લોકોની મુશ્કેલીમાં વધારો કર્યો છે.

ચુરુમાં છેલ્લી રાત છેલ્લા 10 વર્ષમાં નવેમ્બરની બીજી સૌથી ઠંડી રાત હતી. અહીં, ઉત્તર રાજસ્થાનના ગંગાનગર, હનુમાનગઢ, ચુરુ અને સીકરના કેટલાક વિસ્તારોમાં હળવું ધુમ્મસ છવાયું હતું. હવામાન નિષ્ણાતોના મતે તાપમાનમાં આ ઘટાડો એક-બે દિવસ સુધી ચાલુ રહી શકે છે.