ગુજરાતમાં કેમ પડી રહ્યા છે કરા? 61 કિ.મી.ની ઝડપે પવન ફૂંકાશે, વરસાદ-કરાની આગાહી

વિભુ પટેલ, અમદાવાદ: રાજ્યમાં સાક્લોનિક સરક્યુલેશનની અસરના કારણે મોટાભાગના જિલ્લામાં વરસાદી માહોલ જોવા મળી રહ્યો છે. કમોસમી વરસાદ થયો છે અને હજુ પણ આગામી 5 દિવસ ગાજવીજ સાથે સામાન્ય વરસાદની સંભાવના છે. અમુક વિસ્તારમાં કરા પણ પડવાની શક્યતા છે.

હવામાન વિભાગના ડાયરેકટર મનોરમા મોહંતીએ જણાવ્યું છે કે, ગુજરાતમાં આગામી 5 દિવસ વાતાવરણ અને તાપમાન યથાવત રહેશે. આજે બનાસકાંઠા, સાબરકાંઠા, પાટણ, અમરેલી, રાજકોટમાં 41થી 61 કિલોમીટરની ઝડપે પવન ફૂંકાવાની શક્યતા છે. સાથે જ ગાજવીજ અને સામાન્યથી મધ્યમ વરસાદ થશે અને કરા પડવાની પણ શક્યતા છે. ભાવનગર, બોટાદ, ગીર સોમનાથ, જૂનાગઢ, મોરબી, સુરેન્દ્રનગર, કચ્છમાં સામાન્ય વરસાદની શક્યતા છે.

ગુજરાતમાં કમોસમી વરસાદની આગાહી કરવામાં આવી છે. સાંજે 7 વાગ્યા સુધી 20 જિલ્લામાં વરસાદની આગાહી છે. મહેસાણા,સાબરકાંઠા, અરવલ્લી, અમદાવાદ, દાહોદ, મહિસાગર, છોટાઉદેપુર, નર્મદા, ડાંગ, તાપી, વલસાડ, રાજકોટ, જૂનાગઢ, અમરેલી, ભાવનગર, મોરબી, દ્વારકા, ગીરસોમનાથ, કચ્છ, બોટાદમાં ગાજવીજ સાથે વરસાદની આગાહી કરવામાં આવી છે. સાથે જ 40 કિમીની ઝડપે પવન ફુંકાઈ શકે છે અને સામાન્યથી મધ્યમ વરસાદની આગાહી છે.

18 માર્ચે અમદાવાદ, અરવલ્લી, સાબરકાંઠા, દાહોદ, ગાંધીનગર, મહિસાગર, પંચમહાલ, સાબરકાંઠા, ડાંગ, નર્મદા, તાપી, અમરેલી, ગીર સોમનાથ, જામનગર, રાજકોટ અને કચ્છમાં ભારે પવન અને ગાજવીજ સાથે સામાન્યથી મધ્યમ વરસાદની આગાહી છે.

19 માર્ચે બનાસકાંઠા. સાબરકાંઠા, દાહોદ, છોટા ઉદેપુર, અમરેલી, કચ્છમાં ગાજવીજ અને 40 કિલોમીટરની ઝડપે પવન સાથે સામાન્ય વરસાદની શક્યતા છે.

20 અને 21 માર્ચે રાજ્યના અકાદ બે વિસ્તારમાં સામાન્ય વરસાદ થવાનું અનુમાન છે.

અમદાવાદ શહેરમાં પણ ગાઢ ધુમ્મસ જોવા મળ્યું હતું. વિજીબિલીટી ઘટવાના કારણે વાહનચાલકો પરેશાન થયા હતા અને ધુમ્મસના કારણે કૃષિ પાકને પણ નુકસાન થઇ રહ્યું છે. લોકો માવઠાથી છૂટકારો મળે તેની રાહ જોઈએ રહ્યા છે. પરંતુ એક પછી એક સિસ્ટમ સક્રિય થઇ રહી છે. જેના કારણે કમોસમી વરસાદ થાય છે. સામાન્ય રીતે ગુજરાતમાં કરા પડતા નથી, પરંતુ ક્લાઈમેન્ટ ચેન્જની અસર જોવા મળી રહી છે. ગાજવીજ અને ભારે પવન સાથે વરસાદ તો પડી રહ્યો છે, પરંતુ ચાલુ વર્ષે તો કરા પણ પડ્યાં છે.