Gujarat Weather: પાંચ દિવસની આગાહી કરીને હવામાન વિભાગે 2 દિવસ વરસાદની શક્યતા વ્યક્ત કરી

અમદાવાદઃ દેશમાં ચોમાસું કેવું રહેશે તે અંગે કેન્દ્રીય હવામાન વિભાગ દ્વારા આગાહી કરવામાં આવી છે. જેમાં 96% વરસાદ સાથે ચોમાસું સામાન્ય રહેવાની શક્યતાઓ વ્યક્ત કરવામાં આવી છે. જ્યારે ગુજરાતના આગામી પાંચ દિવસના હવામાન અંગેની શક્યતાઓ વ્યક્ત કરીને અમદાવાદ હવામાન કેન્દ્રના ડિરેક્ટર ડૉ. મનોરમા મોહંતીએ જણાવ્યું છે કે, રાજ્યમાં આગામી પાંચ દિવસ સુધી હવામાન સૂકું રહેવાની શક્યતાઓ છે, પરંતુ જોકે, લોકલ કન્વેક્ટિવિટી એક્ટિવિટીની હાલ સંભાવના નથી, જો શક્યતાઓ દેખાશે તો તે અંગેની માહિતી આપવામાં આવશે. જોકે, તેમણે આગામી દિવસોમાં વરસાદ થવાની સંભાવનાઓ વ્યક્ત કરી છે. (IMD)

ડૉ. મોહંતીએ જણાવ્યું છે કે, "26 અને 27 તારીખે વરસાદ થવાની વધારે સંભાવનાઓ નથી. જોકે, 28-29એ વરસાદ થવાની સંભાવનાઓ છે. સૌરાષ્ટ્ર-કચ્છ સહિત ગુજરાતના અન્ય ભાગોમાં વરસાદ થવાની શક્યતાઓ આ દરમિયાન રહેલી છે." વેસ્ટર્ન ડિસ્ટર્બન્સની અસર અને હવામાં વધી રહેલા ભેજના કારણે વરસાદ થવાની શક્યતાઓ છે.

જે બે દિવસ વરસાદની શક્યતાઓ વ્યક્ત કરવામાં આવી છે તેમા ઉત્તર ગુજરાતના બનાસકાંઠા, સાબરકાંઠા, પાટણ, મહેસાણા અને સૌરાષ્ટ્રના અમરેલી, રાજકોટ, ભાવનગરમાં પણ વરસાદ થઈ શકે છે. જ્યારે દક્ષિણ ગુજરાતમાં ભરૂચ તથા આણંદમાં પણ વરસાદ થઈ શકે છે. (ફાઈલ તસવીર)

અમદાવાદમાં થંડર ક્લાઉડ બનવાની શક્યતાઓ છે, જોકે, વરસાદની વધુ સંભાવનાઓ નથી. જો વરસાદની શક્યતાઓ હશે તો ત્રણ કલાક પહેલા તે અંગે માહિતી આપવામાં આવશે તેવું ડૉ. મનોરમા મોહંતીએ જણાવ્યું છે. (ફાઈલ તસવીર)

ચોમાસા અંગે વાત કરતા પણ મનોરમા મોહંતીએ જણાવ્યું કે દેશના હવામાન વિભાગે ગુજરાતમાં ચોમાસું સામાન્ય કરતા નબળું રહેવાની સંભાવના વ્યક્ત કરી છે, આ સાથે ગુજરાતમાં ચોમાસાના આગમનની તારીખ અંગે વાત કરીને તેમણે જણાવ્યું છે કે, કેરળમાં ચોમાસું બેસી જાય અને તે મુંબઈ પહોંચે પછી ગુજરાત અંગેની સંભાવનાઓ વ્યક્ત કરવામાં આવશે. (ફાઈલ તસવીર)

ગુજરાતના માછીમારો માટે બે દિવસ વોર્નિંગ આપવામાં આવી છે, જેમાં ગુજરાતના ઉત્તરપૂર્વ અરબી સમુદ્ર માટે આપવામાં આવી છે. આ સિવાય અમદાવાદ માટે આગામી 5 દિવસ માટે યલો એલર્ટ આપવામાં આવ્યું છે.

રાજ્યમાં અમદાવાદ 43 ડિગ્રી સાથે સૌથી ગરમ શહેર રહ્યું છે. આ સિવાય ગાંધીનગરમાં 42 ડિગ્રી તાપમાન નોંધાયું છે. જ્યારે રાજકોટ, સુરેન્દ્રનગર, વલ્લભ વિદ્યાનગરમાં 41 ડિગ્રી તાપમાન નોંધાયું છે. રાજ્યમાં અમરેલી, ભાવનગર, ડીસા, વડોદરામાં તાપમાન 40 ડિગ્રી તાપમાન નોંધાયું છે.