Gujarat Weather Forecast: રાજ્યના 6 શહેરોનું તાપમાન 33 ડિગ્રીને પાર; ઠંડી રહેશે કે જશે?

અમદાવાદ: રાજ્યમાં કડકડતી ઠંડી બાદ લોકો હાશકારો (Gujarat Weather Forecast) અનુભવી રહ્યા છે. અમદાવાદ સહિત રાજ્યના મોટાભાગના શહેરોમાં ઠંડીનું પ્રમાણ ઘટ્યું છે. આગામી દિવસોમાં ઠંડીનું પ્રમાણ ઘટવાનું અનુમાન છે. રાજ્યમાં તાપમાન ઉંચકાતા ઠંડી ઘટી છે. મોટાભાગના શહોરોમાં લધુત્તમ તાપમાન 13 ડિગ્રી, જ્યારે મહત્તમ તાપમાન 30 ડિગ્રીને પાર પહોંચ્યું છે.

નલિયા અને કંડલાને બાદ કરતાં શહેરોનું લધુત્તમ તાપમાન 13 ડિગ્રીને પાર પહોંચ્યો છે. શુક્રવારે નલિયામાં 6.9 ડિગ્રી, અમદાવાદમાં 14.2 ડિગ્રી, ગાંધીનગરમાં 13.2, વલસાડમાં 35 ડિગ્રી, સુરતમાં 33.4 ડિગ્રી, ભુજમાં 33.6, મહુવામાં 33.4, રાજકોટમાં 33.2 સુરેન્દ્રનગરમાં 33 ડિગ્રી નોંધાયું છે. આમ, રાજ્યના છ શહેરોનું મહત્તમ તાપમાન 33 ડિગ્રીને પાર પહોંચી ગયું છે. અમદાવાદમાં મહત્તમ તાપમાન 30.7 નોંધાયું હતું.

બીજી બાજુ, આગામી ત્રણ દિવસ ગુજરાતમાં સરેરાશ લધુત્તમ તાપમાન 3 ડિગ્રી જેટલું વધતાં ઠંડીમાં ઘટાડો થશે. આગામી ચાર દિવસથી ગરમીમાં સાધારણ વધારો થવાની સંભાવના છે. નિષ્ણાતો અનુસાર, તાપમાનમાં થઇ રહેલા ફેરફારને લીધે રાત્રે ઠંડીનો ચમકારો જોવા મળશે, જ્યારે દિવસે ગરમીને લીધે બેવડી ઋતુ અનુભવાશે.

હવામાન વિભાગે રાજ્યનું હવામાન મોટા ફેરફાર વગરનું રહેવાની સંભાવના વ્યક્ત કરી છે. રાજ્યમાં રાતના તાપમાનમાં પણ આગામી સમયમાં ધીમે-ધીમે વધારો થવાની પણ શરુઆત થશે. ઠંડી હજુ ફેબ્રુઆરી મહિના સુધી રહેશે અને તે પછી તાપમાનમાં વધારો થવાની શરુઆત થઈ જશે.

હવામાન વિભાગના વડા મનોરમા મોહંતીએ રાજ્યમાં ઠંડીની આગાહી કરતા જણાવ્યું છે કે, "ગુજરાતમાં આગામી પાંચ દિવસ હવામાન સૂકું રહેવાની આગાહી છે. રાજ્યમાં વરસાદ થવાની સંભાવના નથી. લઘુત્તમ અને મહત્તમ તાપમાનમાં કંઈ મોટો ઘટાડો થવાની સંભાવના નથી. પરંતુ તાપમાન 2-3 ડિગ્રીનો વધારો થઈ શકે છે. હાલ જે સમય ચાલી રહ્યો છે તેમાં લઘુત્તમ તાપમાનમાં વધારો થશે, રાત્રી દરમિયાન પડતી ઠંડીમાં આગામી પાંચ દિવસમાં ઘટાડો થતો જશે."