Gujarat Weather: હવામાન વિભાગની પણ ગુજરાતમાં 2 દિવસ વરસાદની અને ભારે પવન ફૂંકાવાની આગાહી

અમદાવાદઃ હવામાન વિભાગ દ્વારા આગામી દિવસોમાં હવામાન સૂકું રહેવાની સંભાવનાઓ સાથે કેટલાક ભાગોમાં વરસાદ થવાની શક્યતાઓ વ્યક્ત કરવામાં આવી રહી છે. હવામાન વિભાગે 28 અને 29 તારીખે રાજ્યના કેટલાક ભાગોમાં વરસાદ થવાની સંભાવના વ્યક્ત કરવામાં આવી છે. આ સાથે અમદાવાદ માટે યલો એલર્ટ આપવામાં આવ્યું છે અને માછીમારોને પણ વોર્નિગ આપવામાં આવી છે.

હવામાન વિભાગના અમદાવાદ કેન્દ્રના ડિરેક્ટર મનોરમા મોહંતી દ્વારા આગામી 5 દિવસ ગુજરાતનું હવામાન મોટાભાગે સૂકું હવામાન રહેવાની સંભાવના વ્યક્ત કરી છે. જોકે, લોકલ કન્વેક્ટિવિટીના કારણે ક્યાંક વરસાદ થઈ શકે છે તેવી શક્યતાઓ પણ વ્યક્ત કરવામાં આવી છે. જેમાં 28 અને 29 તારીખે ગુજરાતમાં વરસાદ થવાની સંભાવના પણ હવામાન વિભાગે વ્યક્ત કરી છે.

ડૉ. મોહંતીએ જણાવ્યું કે, "સૌરાષ્ટ્ર-કચ્છ અને ઉત્તર ગુજરાત સહિતના રાજ્યના અન્ય ભાગોમાં વરસાદ થવાની સંભાવના છે. જેમાં બનાસકાંઠા, સાબરકાંઠા, પાટણ, મહેસાણા, રાજકોટ, અમરેલી, બોટાદ, ભાવનગર, આણંદ, વડોદરા, ભરૂચના કેટલાક ભાગોમાં ગાજવીજ સાથે 28 અને 29 તારીખે વરસાદ થવાની શક્યતાઓ છે."

હવામાન વિભાગે જણાવ્યું કે, એક વેસ્ટર્ન ડિસ્ટર્બન્સ (પશ્ચિમ વિક્ષોભ)ની અસરના કારણે વરસાદ થવાની શક્યતાઓ વ્યક્ત કરવામાં આવી રહી છે. હાલ પ્રિ-મોન્સુનનું કોઈ અસર ગુજરાત પર નથી. જોકે, તે આગામી સમયમાં પ્રસ્થાપિત થવાની શક્યતાઓ પણ વ્યક્ત કરવામાં આવી છે.

આગામી 2-3 દિવસમાં તાપમાનમાં બેથી ત્રણ ડિગ્રીનો ઘટાડો થવાની સંભાવના વ્યક્ત કરવામાં આવી રહી છે. જોકે, તે પછી તાપમાનમાં કોઈ મોટા ફેરફારની સંભાવના ના હોવાનું હવામાન વિભાગે જણાવ્યું છે. અમદાવાદનું તાપમાન 43 ડિગ્રી નોંધાયું છે જે આગામી દિવસમાં 41 ડિગ્રી પહોંચવાની શક્યતાઓ વ્યક્ત કરવામાં આવી રહી છે.

આગામી 5 દિવસ માટે અમદાવાદ જિલ્લા માટે યલો એલર્ટ આપવામાં આવ્યું છે. જ્યારે માછીમારોને ત્રણ દિવસ સુધી દરિયોના ખેડવાની સૂચના આપવામાં આવી છે. આ સાથે સૌરાષ્ટ્ર સહિતના ભાગોમાં 30-40 કિલોમીટરની ઝડપે પવન ફૂંકાવાની શક્યતાઓ પણ હવામાન વિભાગ દ્વારા વ્યક્ત કરવામાં આવી છે.

મહત્વનું છે કે અંબાલાલ પટેલ દ્વારા રાજ્યના સૌરાષ્ટ્ર-કચ્છ, ઉત્તર, મધ્ય અને દક્ષિણ ભાગમાં છૂટોછવાયો વરસાદ થવાની આગાહી કરી છે, તેમણે ભારે પવન ફૂંકાવાની સાથે તારીખ 25થી 29 દરમિયાન વરસાદ થવાની શક્યતાઓ વ્યક્ત કરવામાં આવી છે.