Gujarat weather forecast: ગુજરાતમાં બે દિવસ કાળઝાળ ગરમી પડશે, પછી ફરી સૂસવાટાભેર પવન સાથે માવઠું ત્રાટકશે

અમદાવાદ: રાજ્યમાં આજે આકરી ગરમી પડવાની આગાહી કરવામાં આવી છે. આ સાથે આવતીકાલથી માવઠા સાથે તાપ પણ પડવાની આગાહી કરવામાં આવી છે. હવામાન વિભાગના જણાવ્યા પ્રમાણે, ઉત્તર ગુજરાત, સૌરાષ્ટ્ર અને કચ્છ પંથકમાં બુધવારથી ગાજવીજ સાથે કમોસમી વરસાદ શરૂ થવાની આગાહી કરવામાં આવી છે. ગુરૂવારના રોજ અમદાવાદ અને ગાંધીનગરમાં તેમજ શુક્રવારે દક્ષિણ ગુજરાતના સુરત અને ભરૂચમાં પણ માવઠું થવાની આગાહી કરવામાં આવી છે. જ્યારે આજે અને આવતીકાલે એટલે મંગળવાર અને બુધવારે અંગ દઝાડતી ગરમી પડશે.

રાજ્યમાં અનેક વિસ્તારોમાં કમોસમી વરસાદની સાથે સાથે પ્રતિ કલાકે 40 કિ.મી.ની ઝડપે પવન પણ ફૂંકાશે. હવામાન ખાતા દ્વારા આગાહી કરવામાં આવી છે કે, આવતી કાલે બુધવારના રોજ બનાસકાંઠા, પાટણ, મોરબી, જામનગર, રાજકોટ અને કચ્છમાં ગાજવીજ સાથે હળવો કમોસમી વરસાદ પડશે.

ગુરૂવારના રોજ એટલે 30મી તારીખે અમદાવાદ, ગાંધીનગર, અરવલ્લી, મહિસાગર, બનાસકાંઠા, સાબરકાંઠા, સુરેન્દ્રનગર, રાજકોટ, જામનગર, પોરબંદર, મોરબી, દ્વારકા, બોટાદ અને કચ્છમાં તેમજ શુક્રવારના રોજ ભરૂચ, સુરત, અમરેલી, ભાવનગર અને ગીર સોમનાથમાં હળવું માવઠું થવાની આગાહી કરવામાં આવી છે.

ગુજરાતમાં કમોસમી વરસાદની આગાહી કરતા ડૉ. મોહંતી દ્વારા જણાવવામાં આવ્યું કે, કેટલાક વિસ્તારોમાં વીજળીના કડાકા-ભડાકા સાથે પણ વરસાદ થવાની શક્યતાઓ છે. વધુ એક વેસ્ટર્ન ડિસ્ટર્બન્સ અપ્રોચ થઈ રહ્યું છે અને થવાની સંભાવના છે, જેના લીધે સર્ક્યુલેશન બનવાથી ગુજરાતમાં વરસાદ થઈ શકે છે.

ગરમી અંગે જણાવતા તેમણે કહ્યુ કે, આગામી ત્રણ દિવસ દરમિયાન તાપમાનમાં બેથી ત્રણ ડિગ્રીનો વધારો થઈ શકે છે. જોકે, આ પછી તાપમાનમાં 2-3 ડિગ્રીનો ઘટાડો થવાની સંભાવના પણ વ્યક્ત કરવામાં આવી છે.

માવઠાને કારણે આ વખતે કેરીમાં કેસર કેરીના પાક પર અસર થઇ છે. જેથી માર્કેટમાં કેસર કેરી તો નથી જોવા મળી રહી પણ કેરી રસિયાઓ હાફુસ કેરી જરુરથી ખરીદી રહ્યા છે.સામાન્ય રીતે કેરીના શોખીનો ઉનાળાની રાહ જોતા હોય છે આ વખતે કોમસમી વરસાદને કારણે કેસર કેરીના ઉત્પાદન પર અસર તો પડી જ છે. પણ તેની સાથે કેસર કેરી જે સમયગાળામાં પાકીને માર્કેટમાં આવી જાય છે તે પણ માર્કેટમાં જોવા નથી મળી રહી. તો લોકો કેસર કેરીની જગ્યાએ હાફુસ કેરીની ખરીદી કરી રહ્યા છે.

દેશના હવામાનની વાત કરીએ તો, આંતરરાષ્ટ્રીય મૌસમ કચેરીએ જણાવ્યું હતું કે, ભારતમાં 1901 પછી 2023નો ફેબ્રુઆરી મહિનો સૌથી ગરમ મહિનો રહ્યો છે. આ અત્યંત ચિંતાનો વિષય છે. તેથી શંકા છે કે ગયા વર્ષની ગરમીનીવિક્રમજનક લહેરનું પુનરાવર્તન આ વર્ષે પણ દેખવામાં આવશે. ગયા વર્ષે ગરમીના લીધે પાકને ખાસ્સુ નુકસાન ગયું હતું.

આ સાથે તેમણે એમ પણ જણાવ્યુ કે, ગયા વર્ષે લગભગ 50 ડિગ્રી સેલ્સિયસ સુધી તાપમાન પહોંચી ગયું હતું. આ તાપમાન કોઈપણ સ્થિતિમાં અસહ્યનીય હોય છે. અહેવાલ મુજબ ભારતમાં આ ગરમી સતત વધતી જનસંખ્યાના લીધે વધુ અસહ્યનીય થઈ રહી છે. યુનિવર્સિટી ઓફ રીડિંગના એક ક્લાઇમેટ ચેન્જ વૈજ્ઞાાનિક કીરન હંટે જણાવ્યું હતું કે, ભારત સામાન્ય રીતે સહારા જેવા ગરમ સ્થળોની તુલનાએ ભેજવાળુ છે. તેનો અર્થ એમ થાય છે કે પરસેવાના લીધે ગરમીથી બચવાની શક્યતા ઘણી ઓછી રહે છે.