Heatwave in Gujarat: ગુજરાતમાં 22 મે સુધી ફરી હિટવેવની આગાહી, આજે આ શહેરોમાં પડશે કાળઝાળ ગરમી

અમદાવાદ: શહેરમાં (Ahmedabad) સતત બીજા દિવસે ગરમીમાં (Gujarat heatwave) વધારો નોંધાયો છે. હવામાન વિભાગની આગાહી પ્રમાણે, બે દિવસ, 20થી 22મે સુધી શહેરમાં હિટવેવની શક્યતાઓ છે. આજે અમદાવાદ અને ગાંધીનગરમાં યલો એલર્ટ જાહેર કરવામાં આવી છે. ત્યારે ગરમીનો પારો 46 ડિગ્રી સુધી પહોંચી શકે તેવી શક્યતાઓ છે. ગુરૂવારે અમદાવાદ 43.5 ડિગ્રી સાથે સરેરાશ મહત્તમ તાપમાનમાં સામાન્ય કરતાં બે ડિગ્રીનો વધારો નોંધાયો હતો.

હવામાન વિભાગની આગાહી પ્રમાણે, આગામી ત્રણ દિવસમાં અમદાવાદ સહિત ગાંધીનગર તથા સૌરાષ્ટ્રમાં સુરેન્દ્રનગર અને કચ્છમાં હિટવેવની આગાહી છે. હવામાન વિભાગ દ્વારા અમદાવાદ, ગાંધીનગર, સુરેન્દ્રનગર, કચ્છમાં આગામી 20થી 22 મે સુધી યલો એલર્ટ જાહેર કરવામાં આવ્યું છે.

ગુરૂવારે રાજ્યમાં સૌથી વધુ ગરમી અમદાવાદમાં 43.5 ડિગ્રી નોંધાઇ હતી. આ સાથે ગાંધીનગર અને સુરેન્દ્રનગરમાં 43 ડિગ્રી તાપમાન નોંધાયું હતુ. રાજકોટ, અમરેલી જુનાગઢ, ભૂજ, વડોદરા, ડીસા, પાટણમાં તાપમાનનો પારો 40 ડિગ્રીને પાર ગયો હતો. આ ઉપરાંત ભાવનગરમાં 39.2, સુરતમાં 35.4 ડિગ્રી તાપમાન નોંધાયુ હતુ.

ઉત્તર-પશ્ચિમના પવન શરૂ થયા છે જેની અસરથી ગરમીનો પારો અચાનક વધ્યો હતો. જેથી અમદાવાદ સહિત ગુજરાતના અનેક શહેરોમાં ગરમ પવનોનો ફૂંકાઇ રહ્યા છે.

કાળઝાળ ગરમીથી તોબા પોકારી ગયેલા ગુજરાતીઓ હવે વરસાદની રાહ જોઇને બેઠા છે. ત્યારે હવામાન નિષ્ણાત પરેશ ગોસ્વામીનું માનવું છે કે, ચોમાસું 27 મેના કેરળમાં આગમન થવા માટે પરિબળો અનુરૂપ છે. જોકે, હવામાન વિભાગ દ્વારા પણ પૂર્વાનુમાન જાહેર કરવામાં આવ્યું છે કે, 27 મેના કેરળમાં ચોમાસુ બેસી જશે અથવા તો 4 દિવસ આગળ પાછળ થઈ શકે છે. પરંતુ અંદમાનમાં ચોમાસુ બેસી ગયા બાદ ચોમાસાને આગળ વધવાના પરિબળો સાનુકૂળ છે.

હવામાન નિષ્ણાત પરેશ ગોસ્વામીએ ન્યુઝ 18 ગુજરાતી સાથે વાત કરતા જણાવ્યું હતું કે, 2022નું ચોમાસું 16ના અંદમાનમાં આગમન થઈ ગયું છે. કેરળમાં ચોમાસું બેસવાની સામાન્ય તારીખ 1 જૂન છે. પરંતુ ચાલુ વર્ષે 5 દિવસ વહેલું ચોમાસું બેસવાની અનુમાન છે. કેરળમાં ચોમાસુ વહેલું બેસી જાય એટલે ગુજરાતમાં પણ પહેલું બેસી જાય તેવું હોતું નથી. કેરળમાં 27મીના ચોમાસું બેસી જવાના પરિબળો અનુરૂપ છે. કેરળમાં ચોમાસું બેસી ગયા બાદ આગળ વધતું હોય છે. મહારાષ્ટ્ર અને ગોવાના પહોંચ્યા બાદ હવામાન અનુકુળ ન હોય તો સ્થિર થઈ જાય છે એટલે કે, ગુજરાતમાં એન્ટ્રી મોડી થતી હોય છે.