Ambalal Patel Forecast: ઉનાળાની શરૂઆતે જ થશે પાણી-પાણી, અંબાલાલ પટેલની માવઠાની આગાહી

વિભુ પટેલ, અમદાવાદ: શિયાળો પૂર્ણ થતાં માર્ચ મહિનાથી ઉનાળાની શરૂઆત થઈ જાય છે. જોકે, ફેબ્રુઆરી મહિનામાં પણ ઉનાળાની ગરમીનો અહેસાસ થયો છે. હવામાન નિષ્ણાતોનું અનુમાન છે કે, ચાલુ વર્ષનો ઉનાળો આકરો રહેશે. સામાન્ય રીતે ગુજરાતમાં હોળી બાદ મહત્તમ તાપમાન અને લઘુતમ તાપમાન વધવા લાગે છે. પરંતુ ચાલુ વર્ષે તો ફેબ્રુઆરીથી ઉનાળાની ગરમીનો અહેસાસ થવા લાગ્યો છે. હવામાન નિષ્ણાત આંબાલાલ પટેલનું અનુમાન છે કે, માર્ચની શરુઆતથી જ વાતાવરણમાં પલટો આવશે અને માવઠું થવાની શકયતા છે.

હવામાન નિષ્ણાત આંબાલાલ પટેલનું અનુમાન છે કે, આજથી ઉત્તરીય પર્વતીય પ્રદેશમાં વેસ્ટર્ન ડિસ્ટર્બન્સના લીધે વાદળછાયું વાતાવરણ રહેશે અને હિમ વર્ષા થશે. પ્રજાંબ, હરીયાણા, રાજસ્થાનના ભાગોમાં હવામાનમાં પલટો આવશે. માર્ચ મહિનાની શરુઆત સુધીમાં ગુજરાતમાં વાદળછાયું વાતાવરણ રહેશે આજથી ઉતર ગુજરાતમાં કચ્છમાં ઉત્તર ભાગોમાં વાદળછાયુ વાતાવરણ શરુઆત થઈ જશે. જ્યારે 4 માર્ચ સુધીમાં ગુજરાતમાં માવઠું થવાની શક્યતા છે.

4થી 8 માર્ચ સુધીમાં ઉતર ગુજરાત, મધ્ય ગુજરાત, સૌરાષ્ટ્ર, દક્ષિણ ગુજરાતના ભાગોમાં કમોસી વરસાદ થવાની શક્યતા રહેશે. બનાસકાઠા, સમી હારીજ, મહેસાણા, કડી, બેચરાજી, વિરમગામ, સુરેન્દ્રનગર, રાજકોટ, જામનગર જિલ્લાના અમુક ભાગો તેમજ ગીરના ભાગો,આહવા, ડાંગ, સુરત, ગાધીધામ, નખત્રાણા ભાગોમાં કમોસમી વરસાદની સંભાવના છે. બંગાળની ખાંડીના ભેજ અને અરબી સમુદ્રના ભેજના કારણે કમોસી વરસાદ થવાની શક્યતા રહેશે. તેમજ વેસ્ટન ડિસ્ટર્બન્સના કારણે મહારાષ્ટ્રમાં વરસાદ થવાની શક્યતા રહેશે.

બીજી બાજુ, રાજ્યમાં ઉનાળાની સત્તાવાર શરૂઆત થઇ ચૂકી છે. આ અંગે રાજ્યના હવામાન વિભાગે જાહેરાત કરી છે. આવામાં ઉનાળો શરૂઆતથી જ આકરો રહેવાનું અનુમાન છે. રાજ્યના વિધિવત રીતે શિયાળાએ વિદાય લીધી છે.

આ વર્ષે ઉનાળામાં હિટવેવની સંભાવના વધારે રહેવાનું હવામાનનું અનુમાન છે. ઉત્તર પૂર્વમાં પવનોની દિશા બદલાતા ગરમીનું જોર વધશે. આગામી બે દિવસમાં 2થી 3 ડિગ્રી તાપમાનમાં વધારો થશે. અત્યારે અમદાવાદ અને ગાંધીનગરમાં 35થી 37 ડિગ્રી તાપમાન રહેશે.