Gujarat Weather: ગુજરાતના અનેક જિલ્લાના વાતાવરણમાં પલટો, વલસાડમાં છાંટા પડ્યાં, ખેડૂતોની ચિંતા વધી

અમદાવાદ: હવામાન વિભાગે (Meteorological Department) પ્રિ-મોન્સૂન એક્ટિવિટી (Pre-Monsoon activity) દરમિયાન વરસાદની આગાહી પરત ખેંચી છે. પહેલા હવામાન વિભાગે આગાહી કરી હતી કે 25મી મેના રોજ દક્ષિણ ગુજરાત (South Gujarat)માં વરસાદ પડી શકે છે. આ સમાચાર વચ્ચે રાજ્યના અને જિલ્લાના વાતવરણાં પલટો આવ્યો છે. જેમાં બનાસકાંઠા, સાબરકાંઠા, વાપી (વલસાડ), પાટણ, જેતપુર (રાજકોટ)નો સમાવેશ થાય છે. આ જિલ્લાઓમાં સવારથી જ આકાશમાં કાળા ડિબાંગ વાદળો જોવા મળી રહ્યા છે. તો વલસાડમાં વરસાદી છાંટા પડ્યા છે.

બનાસકાંઠા: જિલ્લામાં સતત બીજા દિવસે વાતાવરણમાં પલટો જોવા મળ્યો છે. જિલ્લાના સરહદીય વિસ્તાર વાવ, થરાબ, સુઈગામ, ભાભર, ધાનેરા સહિતના વિસ્તારોમાં વાદળછાયું વાતવરણ સર્જાયું છે. આ વિસ્તારોમાં સવારથી જ આકાશમાં કાળા ડિબાંગ વાદળો જોવા મળી રહ્યા છે. વાતાવરણમાં પલટાથી ધરતીપુત્રોની ચિંતા વધી છે. વાતાવરણમાં પલટાથી બાજરી, એરંડા, જુવાર સહિતના પાકોને નુકસાનની ભીતિ છે.

પાટણ: પાટણ જિલ્લામાં વહેલી સવારથી વાતવરણમાં પલટો જોવા મળ્યો છે. સતત ત્રીજા દિવસે જિલ્લાના વાતવરણમાં પલટો જોવા મળ્યો છે. જિલ્લામાં સવારથી જ ભારે પવન સાથે ઠંડા પવનો ફૂંકાઈ રહ્યા છે. પાટણ જિલ્લાનું આકાશ કાળા ડિબાંગ વાદળોથી ભરાઈ ગયું છે. ભારે પવન સાથે ધૂળની ડમરીઓ ઉડતા રાહદારીઓને હાલાકી પડી રહી છે. બીજી તરફ ઠંડા પવનો ફૂંકાતા ગરમીથી રાહત મળી છે.

જેતપુર: જેતપુરમાં વાતાવરણમાં પલટો જોવા મળી રહ્યો છે. સવારથી જેતપુરમાં વાદળછાયું વાતાવરણ જોવા મળી રહ્યું છે. અચાનક વાતાવરણમાં પલટાથી ગરમીથી રાહત મળી છે. બીજી તરફ ભારે પવનોથી ધૂળની ડમરીઓ ઉડતા રાહદારીઓએ પરેશાનીનો સામનો કરવો પડી રહ્યો છે.

સાબરકાંઠા: સાબરકાંઠા જિલ્લામાં સતત બીજા દિવસે પણ વાતાવરણમાં પલટો જોવા મળ્યો છે. અહીં વહેલી સવારથી જ વાદળછાયું વાતાવરણ જોવા મળી રહ્યું છે. બીજી તરફ ઠંડો પવન ફૂંકાતા લોકોને અસહ્ય ગરમીથી રાહત મળી છે. આ દરમિયાન જો કમોસમી વરસાદ થાય તો ઉનાળું મગફળી, તલ સહિતના પાકોને નુકસાનની ભીતિ છે.

વલસાડ: વાપી શહેરમાં આજે સવારે હળવા છાંટા પડ્યા છે. બીજી તરફ દક્ષિણ ગુજરાતના વાતાવરણમાં પલટો જોવા મળ્યો છે. ઘણા જિલ્લાઓમાં સવારથી વાદળછાયું વાતવરણ જોવા મળી રહ્યું છે. વાપી શહેરમાં વરસાદી છાંટા પડતા વાતાવરણમાં ઠંડક પ્રસરી છે.

તાપમાનમાં વધારો થશે: હવામાન વિભાગની આગાહી પ્રમાણે રાજ્યમાં આગામી 48 કલાક દરમિયાન તાપમાનમાં બેથી ત્રણ ડિગ્રીનો વધારો થશે. બીજી તરફ હવામાન વિભાગે 25મી તારીખે વરસાદની આગાહી કરી હતી તે પરત ખેંચી છે. હવામાન વિભાગના જણાવ્યા પ્રમાણે પવનની દિશા બદલાતા વાતાવરણમાં બદલાવ થયો છે. (તસવીર: અરવલ્લી)