રાજ્યમાં બે દિવસ માવઠાની આગાહી, અહીં પડી શકે છે કમોસમી વરસાદ

અમદાવાદ: છેલ્લા બે દિવસથી રાજ્યના વાતાવરણમાં પલટો જોવા મળી રહ્યો છે. પંચમહાલ સહિતના વિસ્તારોમાં માવઠું થયું છે, ત્યારે હવામાન વિભાગની આગાહી સામે આવી છે. આગાહી અનુસાર, 2 દિવસ રાજ્યના કેટલાક વિસ્તારોમાં માવઠુ થઈ શકે છે. દક્ષિણ ગુજરાતના કેટલાક જિલ્લામાં માવઠું થઈ શકે છે. અરબી સમુદ્રમાં વેલમાર્ક લો પ્રેશર સક્રિય છે, જેના લીધે રાજ્યના વાતાવરણમાં પલટો આવ્યો છે. પૂર્વ મધ્ય, દક્ષિણ પૂર્વ અરબી સમુદ્રમાં સિસ્ટમ સક્રિય છે. જેના પગલે રાજ્યમાં આગામી બે દિવસ વરસાદી માહોલ રહેશે.

અરબી સમુદ્રમાં વેલમાર્ક લો પ્રેશર સક્રિય હોવાને પગલે રાજ્યના સૌરાષ્ટ્રના રાજકોટ, જૂનાગઢમાં કમોસમી વરસાદ પડી શકે છે. અરવલ્લી, મહીસાગરમાં પણ હળવો વરસાદ થઈ શકે છે. સૌરાષ્ટ્રમાં ફક્ત એક દિવસ માટે માવઠાની આગાહી છે. અન્ય જગ્યાએ બે દિવસ સુધી માવઠાની આગાહી છે. હવામાન વિભાગની સિસ્ટમ મોનિટરીંગ કરી રહી છે.

લો પ્રેશર સક્રિય થતાં દક્ષિણ ગુજરાત અને સૌરષ્ટ્રમાં સામાન્ય વરસાદની શકયતા છે. દક્ષિણ ગુજરાતના સુરત વલસાડ તાપી ડાંગ માં વરસાદ થવાની શક્યતા છે. ઉત્તર ગુજરાતમાં અરવલ્લી મહીસાગર વરસાદની શક્યતા છે. આ બે દિવસ બાદ વાતાવરણ સૂકું રહેવાનું અનુમાન છે. સાથે જ પવનના કારણે ઠંડીનો અહેસાસ થશે.

ગુજરાતના મોટાભાગનાં વિસ્તારો વાતાવરણમાં પલટો આવ્યો છે. અમદાવાદમાં પણ બપોરે અનેક વિસ્તારોમાં ધીમી ધારે કમોસમી વરસાદ વરસ્યો હતો. શહેરનાં અનેક વિસ્તારોમાં વરસાદી છાંટા પડ્યા પડ્યા છે. શહેરનાં SG હાઈવે, પ્રહલાદનગરમાં વરસાદી છાંટા પડ્યા છે. આ ઉપરાંત રાજ્યનાં અન્ય કેટલાક વિસ્તારોમાં પણ વરસાદ વરસ્યો છે. પંચમહાલ, હિંમતનગર, ડાકોરમાં પણ વરસાદ વરસ્યો છે.

વાદળછાયા વાતાવરણ વચ્ચે આજે સવારે પંચમહાલ જિલ્લામાં કમોસમી વરસાદ પડ્યો છે. સવારે વાતાવરણમાં આવેલા પલટા બાદ માવઠું થયું છે. શહેરા સહિત આસપાસના વિસ્તારમાં વરસાદ પડ્યો છે. જ્યારે કમોસમી વરસાદથી ખેડૂતો ચિંતામાં મૂકાયા છે. તુવેર, ઘઉં, રાયડો, મકાઈના પાકને નુક્સાનની ભીતિ સેવાઇ રહી છે.