આજે અમદાવાદ સહિત અહીં માવઠાની આગાહી; તો ઠંડી ક્યારે પડશે?

અમદાવાદ: આ વખતે ઠંડી પડશે કે નહીં? ઘર કે બહાર ચાની ચુસ્કી લેતાં આ સવાલ વધુ ચર્ચાઇ રહ્યો છે. ડિસેમ્બર મહિનાની 17 તારીખ થઇ ગઇ હોવા છતાં જોઇએ તેવી ઠંડી પડી નથી. થોડા દિવસો અગાઉ થોડો ચમકારો લાગ્યા બાદ હવે ફરી સ્વેટર કબાટમાં મૂકવાનો વારો આવ્યો છે. આ બધું વેસ્ટર્ન ડિસ્ટર્બન્સને લીધે થયું રહ્યું હોવાનું મનાય છે. આ સાથે જ છેલ્લા ત્રણ દિવસથી માવઠું થઇ રહ્યું છે, ત્યારે રાજ્યના અમુક ભાગોમાં આજે માવઠું થવાની સંભાવના છે.

આજે અમદાવાદ, આણંદ, વડોદરા, ભરૂચ, ભાવનગર અને ગીર સોમનાથમાં હળવો કમોસમી વરસાદ થવાની આગાહી છે. અમદાવાદમાં લધુત્તમ તાપમાન 20 ડિગ્રી રહેશે. હવામાન વિભાગની આગાહી અનુસાર, આગામી 48 કલાક સુધી લધુત્તમ તાપમાનમાં કોઇ ફેરફાર થશે નહીં. તે બાદ 2-3 ડિગ્રી તાપમાન ગગડશે અને ઠંડી વધશે.

વેસ્ટર્ન ડિસ્ટર્બન્સને લીધે રાજ્યના કેટલાક ભાગોમાં માવઠું થઇ રહ્યું છે. જેના કારણે કડકડતી ઠંડી પડવામાં વિલંબ થયો છે. રાજ્યમાં ડિસેમ્બર મહિનાની શરૂઆત સાથે જ ઠંડી જામતી હોય છે, પરંતુ હાલ બે સપ્તાહ વિતી ગયા છતાં ઠંડીનો ખાસ અહેસાસ થઇ રહ્યો નથી. વેસ્ટર્ન ડિસ્ટર્બન્સને લીધે આવું થઇ રહ્યું હોવાનું મનાય છે. બીજી બાજુ, બે-ત્રણ દિવસ બાદ ઠંડીમાં વધારો થશે.

અરબી સમુદ્રમાં ડિપડિપ્રેશન સિસ્ટમ સક્રિય છે, પરંતુ સિસ્ટમ પશ્ચિમ ઉત્તર પશ્ચિમ દિશા તરફ આગળ વધી રહી છે. જેના કારણે ગુજરાતના વાતાવરણ પર અસર જોવા નહીં મળે અને ગુજરાત પરથી વાદળો હટી જશે. જોકે, અરબી સમુદ્રમાં સિસ્ટમ સક્રિય હોવાના કારણે ગુજરાતના વાતાવરણમાં પલટો આવ્યો હતો

છેલ્લા ત્રણ દિવસથી અમુક વિસ્તારમાં વરસાદ પડ્યો અને ખેડૂતોની ચિંતા વધારી છે. સાથે જ ડિસેમ્બરના બે સપ્તાહ વિતી ગયા છતાં ઠંડી નહીં પડતા જીરુ-ઘઉંના પાકને નુકસાન થવાની ખેડૂતોને ભીતિ છે. જોકે, બે દિવસ બાદ તાપમાનમાં ઘટાડો થઇ ઠંડીનું જોર વધવાની સંભાવના છે