સમગ્ર ગુજરાતમાં કમોસમી વરસાદનું વિઘ્ન; ખેડૂતોની મહેનત પર પાણી ફર્યું, કચ્છમાં APMCમાં અનાજ પલળ્યું!

સમગ્ર ગુજરાતમાં કમોસમી વરસાદ પડી રહ્યો છે. ત્યારે ગુજરાતના હવામાન વિભાગે આગામી બે દિવસ સુધી વરસાદી માહોલ છવાયેલો રહેશે તેવી આગાહી કરી છે.

ઉલ્લેખનીય છે કે, ઉત્તર ગુજરાત, દક્ષિણ ગુજરાત, સૌરાષ્ટ્ર અને કચ્છ સહિત મધ્ય ગુજરાતમાં પણ માવઠા પડી રહ્યા છે. જાણે ભરઉનાળે ગુજરાતમાં ભાદરવા જેવો માહોલ છવાઈ ગયો છે. તેને લઈને અનેક લોકોને હાલાકીનો સામનો કરવો પડી રહ્યો છે.

માવઠાંને કારણે ભૂજ એપીએમસીમાં ભારે નુકસાન થયું છે. માર્કેટ યાર્ડમાં ખુલ્લામાં પડેલો અનાજનો જથ્થો પલળી ગયો છે. રાયડો, ધાણા અને અન્ય પાક પલળી ગયા છે

ઉલ્લેખનીય છે કે, એપીએમસી ગોડાઉન માલ-સામન ભરવાની અપૂરતી સગવડ હોવાથી માલ પલળી ગયો છે અને હવે મોટા પ્રમાણમાં નુકસાન થાય તેવી ભીતિ સેવાઈ રહી છે.

તો બીજી તરફ, ગુજરાતના અનેક જિલ્લામાં વાવાઝોડું આવ્યાના પણ બનાવ બન્યાં છે. જેને લઈને અનેક જગ્યાએ ઝાડ પડવાની ઘટના પણ બની છે. આ ઘટનામાં કોઈ જાનહાનિ થઈ નથી.

સમગ્ર ગુજરાતમાં એકબાજુ વરસાદી કાળાડિબાંગ વાદળો છવાઈ ગયા છે, તો ખેડૂતોને માથે ચિંતાના વાદળો છવાઈ ગયા છે. એકબાજુ પાક તૈયાર થઈ ગયો છે અને કમોસમી વરસાદનું વિઘ્ન આવી પડ્યું છે. આવા સમયે ખેડૂતોની મહેનત પર પાણી ફરી વળે તેવી સ્થિતિ પેદા થઈ છે અને તેમને ખૂબ જ મોટા પ્રમાણમાં નુકસાન થશે તેવી શક્યતા છે. જેને લઈને ખેડૂતોને રાતા પાણીએ રોવાનો વારો આવ્યો છે.