GTUમાં એન્જીનીયરીંગનો અભ્યાસક્રમ હવે ગુજરાતીમાં પણ ભણાવશે : ફટાફટ જાણી લો વિગતો

સંજય ટાંક, અમદાવાદ: એકતરફ વિશ્વભરમાં માતૃભાષા દિવસની ઉજવણી થઈ  ગુજરાતમાં ઘણી સંસ્થાઓ માતૃભાષા સપ્તાહમાં ઉજવણી કરી રહી છે ત્યારે ગુજરાત ટેકનોલોજીકલ યુનિવર્સિટી તરફથી મહત્વના સમાચાર સામે આવ્યા છે. જે વિધાર્થીઓ એન્જીનીયરીંગ ગુજરાતીમાં ભણવા માંગે છે તેઓ માટે આ સમાચાર અગત્યના છે. આવા વિદ્યાર્થીઓને ગુજરાતીમાં એન્જીનીયરીંગ કરાવવા માટેની તૈયારી GTU કરી રહ્યું છે.

શુ છે GTUનું પ્રાદેશિક ભાષામાં એન્જીનીયરીંગ કોર્ષ ચલાવવાનું આયોજન તે જાણવું જરૂરી છે. આગામી સમયમાં એન્જિનિયરિંગનો અભ્યાસક્રમ ગુજરાતી, પંજાબી અને ઓડિયા ભાષામાં પણ ભણાવવામાં આવે તેવી શક્યતા શરૂ થઈ છે. આજ સુધી એન્જિનિયરિંગનો અભ્યાસક્રમ માત્ર અંગ્રેજી ભાષામાં જ ભણાવવામાં આવી રહ્યો છે. પરંતુ હવે દેશ તેમાં પ્રાદેશિક ભાષામાં ભણાવવા પર ભાર મુકવામાં આવી રહ્યો છે. પ્રાદેશિક ભાષામાં એન્જિનિયરિંગનો અભ્યાસક્રમ ભણાવવા માટે કોલેજો પણ ઉત્સુક છે.

કાઉન્સિલે સમગ્ર ભારતમાં 19 ઈજનેરી કોલેજોમાં 1230 સીટને મંજૂરી આપી છે હાલમાં દેશની 14 ભાષાઓમાં એન્જીનિયરિંગના પુસ્તકોનુ ભાષાંતર કરવામા આવી રહ્યુ છે. ત્યારે આગામી શૈક્ષણીક સત્રથી ગુજરાતમાં પણ પ્રાદેશીક ભાષામાં એન્જીનિયરિંગનો અભ્યાસ કરી શકાશે અને આ માટે પુસ્તકોને ટ્રાન્સલેશન કરવામા આવી રહ્યુ છે. જે ટુંક સમયમાં તૈયાર થઇ જશે. પુસ્તકો ઉપરાંત એઆઇસીટીઇની પ્રશ્ન બેંક પણ તૈયાર કરવામા આવી રહી છે. અને આ માટે 20 લાખ રૂપિયાની ગ્રાન્ટ સરકાર દ્વારા પ્રાપ્ત થઇ છે.

જીટીયુના કુલપતિ પ્રો. ડૉ. નવીન શેઠે જણાવ્યું હતું કે , માતૃભાષાનું ગૌરવ દરેક વિદ્યાર્થીઓ અને નાગરીકોને હોવું જ જોઈએ. રાષ્ટ્રીય શિક્ષણનીતિમાં પણ માતૃભાષાને પ્રાધાન્ય આપવામાં આવ્યું છે. આગામી સમયમાં જીટીયુ ખાતે પણ અનેક ટેક્નિકલ કોર્ષ માતૃભાષામાં શરૂ કરવામાં આવશે. જે માટે GTUએ તૈયારીઓ શરૂ કરી છે. મહત્વનું છે કે હાલ કેટલી કોલેજ ગુજરાતીમાં એન્જીનીયરીંગ કોર્ષ ચલાવવા માંગે છે તેની માહિતી મંગાવવામાં આવી રહી છે.  આ તૈયારીઓને જોતા આગામી સત્રથી એન્જીનીયરીંગ ગુજરાતીમાં ભણાવવાનું શરુ થઇ જાય તો નવાઈ નહી.