Gujarat Rain Forecast: હવામાન વિભાગે આપ્યા રાહતના સમાચાર, રાજ્યમાં આ તારીખથી વરસાદનું જોર ઘટશે

અમદાવાદ: ચોમાસાને લઈને હવામાન વિભાગ (Meteorological department) તરફથી દરરોજ માહિતી આપવામાં આવી રહી છે. આજે એટલે કે 21મી જુલાઈના રોજ હવામાન વિભાગે આગામી પાંચ દિવસને લઈને વરસાદની આગાહી (Gujarat rain forecast) આપી છે. હવામાન વિભાગના જણાવ્યા પ્રમાણે 22મી જુલાઈથી રાજ્યમાં વરસાદનું જોર ઘટશે. 24મી જુલાઈના રોજ કચ્છ જિલ્લામાં અત્યંત ભારે વરસાદની આગાહી આપવામાં આવી છે. જ્યારે 22મી જુલાઈના રોજ નવસારી અને વલસાડમાં અતિભાર વરસાદની આગાહી છે. અમદાવાદ હવામાન વિભાગના ડાયરેક્ટર મનોરમા મોહંતી (Dr Manorama Mohanty)એ આ માહિતી આપી હતી.

22મી જુલાઈ: હવામાન વિભાગના જણાવ્યા પ્રમાણે 22મી જુલાઈના રોજ નવસારી અને વલસાડના અમુક વિસ્તારોમાં અતિભારે વરસાદ પડી શકે છે. આ સિવાય અન્ય જિલ્લા માટે કોઈ વોર્નિંગ આપવામાં આવી નથી.

23 જુલાઈ: આ તારીખે કચ્છ, બનાસકાંઠા, પાટણ, સાબરકાંઠા, મહેસાણા, અરવલ્લી, ગાંધીનગર, મોરબી અને સુરેન્દ્રનગરમાં ભારેથી અતિભારે વરસાદ ખાબકી શકે છે. જામનગર, રાજકોટ, બોટાદ, અમદાવાદ અને ખેડામાં ભારે વરસાદ પડી શકે છે.

24 જુલાઈ: આ તારીખે કચ્છમાં અત્યંત ભારે વરસાદની આગાહી. આ ઉપરાંત બનાસકાંઠા, પાટણ, મહેસાણા, મોરબી, સુરેન્દ્રનગર, જામનગર અને દેવભૂમિ દ્વારકામાં ભારેથી અતિભારે વરસાદ પડી શકે છે. સાબરકાંઠા, અરવલ્લી, ગાંધીનગર, અમદાવાદ, ખેડા, બોટાદ, પોરબંદર, રાજકોટમાં ભારે વરસાદ પડી શકે છે.

25 જુલાઈ: આ દિવસે કચ્છ, મોરબી, જામનગર, દેવભૂમિ દ્વારકા, ભરૂચ, સુરત, નવસારી અને વલસાડમાં ભારે વરસાદ પડી શકે છે.

બીજી તરફ 20મી જુલાઈના રોજ આપત્તિ વ્યવસ્થાપન મંત્રી રાજેન્દ્ર ત્રિવેદીએ કહ્યુ હતુ કે, રાજ્યમાં સંભવિત રેડ એલર્ટની પરિસ્થિતિમાં નાગરિકોને કોઈપણ પ્રકારની તકલીફ ન પડે તેમજ ઉદભવનારી તમામ પરિસ્થિતિને પહોંચી વળવા વહીવટી તંત્ર સંપૂર્ણ સજ્જ છે.

મંત્રીએ ઉકાઈ ડેમની વિગતો આપતા કહ્યુ હતુ કે, ઉપરવાસમાં પડેલા વધુ વરસાદના કારણે ઉકાઈ ડેમમાં પાણીની આવક વધતા ડેમમાંથી તબક્કાવાર બે લાખ ક્યુસેક જેટલું પાણી છોડાઈ રહ્યું છે. આ પરિસ્થિતિમાં સુરતવાસીઓએ કોઈ ચિંતા કરવાની જરૂર નથી. ગુજરાતની જીવાદોરી સરદાર સરોવર ડેમમાં હાલ કુલ 56 ટકા જળરાશીનો સંગ્રહ થયો છે. સૌરાષ્ટ્રમાં ખોડિયાર, હિરણ અને આંબાજળ ડેમ હાઈ એલર્ટ પર મૂકવામાં આવ્યા છે.

મંત્રીએ વધુમાં જણાવ્યુ હતુ કે, રાજ્યના વિવિધ વિસ્તારોમાં વધુ વરસાદના કારણે આશ્રય સ્થાનોમાં આશરો લઇ રહેલા તમામ નાગરીકો હાલની સ્થિતિએ સલામત રીતે પોતાના સ્વગૃહે પરત ફર્યા છે. રાજ્યમાં ૭૪,૨૩૨ નાગરિકોને કેશડોલ્સ ચુકવવામાં આવી છે, જ્યારે સર્વેની કામગીરી પૂર્ણતાને આરે છે. અત્યાર સુધીમાં NDRF, SDRF અને વહીવટી તંત્રના સહયોગથી ૧૫૬૬ નાગરિકોના રેસ્ક્યૂ કરવામાં આવ્યા છે.