ગુજરાતમાંથી કેમ મેઘરાજા જવાનું નામ લેતા નથી? જાણો ચોમાસાની વિદાય બાદ વરસાદનું કારણ

વિભુ પટેલ, અમદાવાદ: રાજ્યમાં ચોમાસાની સિઝનનો સારો વરસાદ થયો છે. રાજ્યના ડેમ, નદી-નાળા છલોછલ છે, પરંતુ ચોમાસાની વિદાય બાદ પણ ગુજરાતના અનેક વિસ્તારોમાં સામાન્ય વરસાદ થયો છે. આ સામાન્ય વરસાદને કારણે મોટું નુકસાન પણ થઇ શકે છે. ચોમાસુ પાક તૈયાર થઈ ગયો છે. તેના પર વરસાદ થતાં ખેડૂતોની ચિંતામાં વધારો થયો છે.

ગુજરાતમાંથી મેઘરાજા ન જવાની જીદ પકડી હોય એવું લાગી રહ્યું છે. ગુજરાતના મોટાભાગના વિસ્તારોમાંથી ચોમાસએ વિદાય લીધી છે. તેમ છતાં લોકલ કનેક્ટિવિટીના કારણે વરસાદ થઈ રહ્યો છે. હજુ પણ ત્રણ દિવસ તો વરસાદ જવાનું નામ લેવાનો નથી.

હવામાન વિભાગે આગાહી કરી છે કે, આગામી ત્રણ દિવસ સામાન્ય વરસાદ થવાની સંભાવના છે. ડાંગ, નવસારી, વલસાડ, અમરેલી, ભાવનગર, દિવમાં સામાન્ય વરસાદની સાંભવના છે. ગુજરાતમાં ઉત્તર પૂર્વના પવન ફૂંકાય રહ્યા છે. બેવડીઋતુનો અહેસાસ થઈ રહ્યો છે. કારણ કે મહત્તમ તાપમાન ઊંચું અને લઘુતમ તાપમાન નીચું રહે છે.

ચોમાસાની વિદાયના માપદંડ શું હોય છે?  હવામાન વિભાગના ડાયરેક્ટર મનોરમા મોહંતીએ જણાવ્યું છે કે, ભેજનું પ્રમાણ અને પવનની દિશા પરથી ચોમાસાની વિદાયની જાહેરાત કરવામાં આવતી હોય છે. આ માટે હવામાં 5 કિલોમીટર સુધી ભેજ ન હોવો જોઈએ અને વરસાદ પણ ન થવો જોઇએ.

ચોમાસાની વિદાય બાદ પણ વરસાદ થયો તેનું કારણ છે? ગુજરાત પર કોઈ સિસ્ટમ ન હતી, પરંતુ મધ્યપ્રદેશ પર એક સિસ્ટમ હતી. જેના કારણે ગુજરાતના અમુક વિસ્તારમાં વરસાદ થયો. તેમજ થન્ડર સ્ટ્રોમ એક્ટિવિટીના કારણે પણ વરસાદ થાય છે. તાપમાન ઊંચું અને ભેજ આવતા થન્ડર સ્ટ્રોમ એક્ટિવિટી થાય છે.

અત્યારે ટ્રાન્ઝેક્શન પિરિયડ ચાલી રહ્યો છે અને લોકલ કનેક્ટિવિટી થવાના કારણે આગામી 3 દિવસમાં સામાન્ય વરસાદની સાંભવના છે. લોકલ કનેક્ટિવિટીના કારણે થતાં સામાન્ય વરસાદે ખેડૂતોના તૈયાર થયેલા પાક પર પાણી ફરી રહ્યું છે.