Gujarat Rain Forecast: પાંચ દિવસ રાજ્યમાં વરસાદ મનમૂકીને વરસશે, જાણો કયા દિવસે પડશે ભારે વરસાદ

અમદાવાદ: ગુજરાતમાં આગામી પાંચ દિવસ મેઘરાજા મનમૂકીને વરસશે. હવામાન વિભાગ (Meteorological department) ના જણાવ્યા પ્રમાણે આગામી બે દિવસ રાજ્યમાં ભારે વરસાદ (Heavy rain forecast) પડી શકે છે. બીજી તરફ આઠમી ઓગસ્ટથી 10મી ઓગસ્ટ સુધી અતિભારે વરસાદ પડી શકે છે. દક્ષિણ ગુજરાત (South Gujarat) અને સૌરાષ્ટ્રના વિવિધ વિસ્તારોમાં અત્યંત ભારે વરસાદની આગાહી આપવામાં આવી છે. સુરત, વલસાડ, નવસારી, તાપી, દમણ અને દાદરાનગર હવેલીમાં અત્યંત ભારે વરસાદની આગાહી છે. જામનગર, રાજકોટ, પોરબંદર, દ્વારકામાં પણ અતિભારે વરસાદની આગાહી છે. બીજી તરફ અમદાવાદ અને ગાંધીનગર શહેરમાં પણ ભારે વરસાદની આગાહી છે. હવામાન વિભાગના વૈજ્ઞાનિક વિજીનલાલના જણાવ્યા પ્રમાણે બંગાળની ખાડીમાં સર્જાયેલા લૉ પ્રેશરને કારણે રાજ્યમાં સારો વરસાદ પડશે. બીજી તરફ છેલ્લા 24 કલાકમાં રાજ્યના 32 જિલ્લાના 190 તાલુકામાં વરસાદ નોંધાયો છે. જેમાં સૌથી વધારે વરસાદ સુરેન્દ્રનગર જિલ્લાના વઢવાણમાં 120 એમ.એમ. નોંધાયો છે.

રાજ્યમાં પડેલો વરસાદ: રાજ્યમાં અત્યારસુધી સિઝનનો સરેરાશ 74.74 ટકા વરસાદ પડ્યો છે. જેમાં કચ્છમાં સૌથી વધારે 121.65 ટકા વરસાદ વરસી ગયો છે. ઉત્તર ગુજરાતમાં 62.45 ટકા, પૂર્વ-મધ્ય ગુજરાતમાં 65.45, સૌરાષ્ટ્રમાં 67.52 ટકા અને દક્ષિણ ગુજરાતમાં 86.27 ટકા વરસાદ પડ્યો છે.

24 કલાકમાં પડેલો વરસાદ:  છેલ્લા 24 કલાકમાં રાજ્યના 32 જિલ્લાના 190 તાલુકામાં વરસાદ નોંધાયો છે. જેમાં સૌથી વધારે વરસાદ સુરેન્દ્રનગર જિલ્લાના વઢવાણમાં 120 એમ.એમ. નોંધાયો છે. (Shutterstock તસવીર)

ઉપલેટામાં વરસાદ: આજે સવારથી ઉપલેટા તેમજ તાલુકાના ગ્રામ્ય વિસ્તારમાં ધોધમાર વરસાદ પડી રહ્યો છે. ઉપલેટામાં વહેલી સવારથી વરસાદ વરસતા ખેતરોમાં પાણી ભરાયા છે. રાજકોટ જિલ્લાના ઉપલેટા તાલુકાના ગઢાળા, ખાખી જાળીયા, સેવંત્રા, મોજીરા, નવાપરા વિસ્તારમાં વરસાદ વરસી રહ્યો છે.

સુરેન્દ્રનગર જિલ્લામાં વરસાદ: સુરેન્દ્રનગર જિલ્લામાં સતત બીજા દિવસે વહેલી સવારથી વરસાદી માહોલ જામ્યો છે. સુરેન્દ્રનગર શહેરમાં વહેલી સવારથી ઝરમર વરસાદ વરસી રહ્યો છે. ગઇકાલે એક જ દિવસમાં સાડા ચાર ઇંચ વરસાદના કારણે નીચાણવાળા વિસ્તારમાં પાણી ભરાયા હતા. સતત બીજા દિવસે ઝરમર વરસાદથી લોકોના ઘરોમાં પાણી ઘૂસી જવાની ભીતિ છે.

ગીર સોમનાથ: સૌરાષ્ટ્રમાં બે દિવસથી સારો વરસાદ વરસી રહ્યો છે. ગીર-સોમનાથ જિલ્લાનું પ્રાચી તીર્થ વરસાદથી પાણીમાં ગરકાવ થઈ ગયું છે. પ્રસિદ્ધ માધવરાયનું મંદિર પાણીમાં ગરકાવ થયું છે. મચ્છુન્દ્રી નદી પર આવેલો દ્રોણેશ્વર ડેમ ભારે વરસાદ બાદ ઓવરફ્લો થયો છે.