Monsoon Update: ગુજરાતમાં ભારે વરસાદનો રાઉન્ડ શરૂ થશે, આ જિલ્લામાં ઓરેન્જ એલર્ટ જાહેર

એક સપ્તાહથી વધુ સમયથી રાજ્યમાં વધતા ઓછા પ્રમાણમાં અલગ-અલગ વિસ્તારમાં વરસાદ વરસ્યો છે. હજુ પણ હળવો વરસાદ યથાવત છે. એવામાં હવામાન વિભાગના અનુમાન પ્રમાણે રવિવારે બનાસકાંઠા અને સાબરકાંઠામાં ભારે વરસાદની સંભાવના છે. આ ઉપરાંત 15 ઓગસ્ટે નવસારી, વલસાડ, દમણ અને દાદરા નગર હવેલીમાં ભારેથી અતિભારે વરસાદની સંભાવના છે. જ્યારે બનાસકાંઠા, સાબરકાંઠા, મહેસાણા, અરવલ્લી, સુરત, ડાંગ અને તાપીમાં ભારે વરસાદ વરસી શકે છે.

16 ઓગસ્ટે બનાસકાંઠા, સાબરકાંઠા, નવસારી અને વલસાડમાં ભારેથી અતિભારે વરસાદની સંભાવના છે. જ્યારે ભરૂચ, સુરત, ડાંગ, તાપી, કચ્છ તથા દમણ અને દાદરા નગર હવેલીમાં ભારે વરસાદની સંભાવના છે. રાજ્યમાં અત્યાર સુધીમાં સિઝનનો 84 ટકા વરસાદ વરસી ચૂક્યો છે. જેમાં કચ્છમાં સૌથી વધુ 133 ટકા વરસાદ વરસ્યો છે. હવામાન વિભાગે ચાલુ સિઝનમાં રાજ્યમાં સામન્ય કરતાં વધુ વરસાદની સંભાવના દર્શાવી હતી. જે સાચી ઠરે તો નવાઈ નહીં. કારણ કે હજુ પણ વરસાદનો એક મહિનો બાકી છે.

હવામાન વિભાગની આગાહી અનુસાર, આગામી 5 દિવસ ભારે વરસાદ પડવાની શક્યાતા છે. ત્યાં જ બનાસકાંઠા, સાબરકાંઠા, કચ્છ, અરવલ્લી, વલસાડ, નવસારીમાં ભારે વરસાદની આગાહી છે. અરબી સમુદ્રમાં વેલ માર્ક લો પ્રેશર સક્રિય થયું છે. જેથી સાવચેતીના પગલા સ્વરૂપે માછીમારોને દરિયો ન ખેડવા સૂચના આપવામાં આવી છે.

ગુજરાતમાં અત્યારસુધી પડેલા વરસાદની વિગત જોઈએ તો સરેરાશ 83.70 ટકા વરસાદ પડ્યો છે. જેમાં કચ્છમાં સૌથી વધારે 133.79 ટકા, ઉત્તર ગુજરાતમાં 74.18 ટકા, પૂર્વ-મધ્ય ગુજરાતમાં 71.87 ટકા, સૌરાષ્ટ્રમાં 78.30 ટકા અને દક્ષિણ ગુજરાતમાં 93.28 ટકા વરસાદ પડ્યો છે.

ગુજરાતમાં છેલ્લા 24 કલાકમાં પડેલા વરસાદની વિગત જોઈએ તો 217 તાલુકામાં વરસાદ નોંધાયો છે. સાબરકાંઠાના વિજાપુરમાં સૌથી વધારે છ ઇંચ વરસાદ પડ્યો છે. રાજ્યના પાંચ તાલુકામાં છેલ્લા 24 કલાકમાં ચાર ઇંચ કરતા વધારે વરસાદ પડ્યો છે. રાજ્યના 59 તાલુકામાં એક ઇંચ કરતા વધારે વરસાદ નોંધાયો છે.