Rainfall in Ahmedabad: ધોધમાર વરસાદ બાદ અમદાવાદમાં ટ્રાફિકજામ, શહેરના ગરનાળાઓમાં પાણી ભરાયા

અમદાવાદ: શહેરમાં આજે પાંચ વાગ્યા બાદ અચાનકથી વાતાવરણમાં પલટો આવ્યો હતો. જેના પછી શહેરના તમામ વિસ્તાર પર કાળાડીબાંગ વાદળો ઘેરાયા હતા અને વીજળીના કડાકા સાથે વરસાદ વરસ્યો હતો. શહેરના વાસણા, જમાલપુર, બોડકદેવ, થલતેજ, એસજી હાઇવે, રિવરફ્રંટ, જુનાવાડજ તેમજ વસ્ત્રાપુરમાં વરસાદ વરસ્યો છે. ત્યાં જ શહેરના એસજી હાઇવે પર વાવાઝોડા સાથે વરસાદ વરસ્યો છે. જેના કારણે હાઇવે પર લગાવેલા હોર્ડિંગ્સો ફાટી ગયા છે ત્યાં જ રોડ પર પાણી ભરાતા વાહનચાલકો મુશ્કેલીમાં મૂકાયા છે.

અમદાવાદમાં એકાએક થંડર સ્ટ્રોમ આવતા શહેરમાં ઠંડક પ્રસરી ગઇ છે. ત્યાં જ શહેરના વાતાવરણમાં બદલાવ આવતા સ્પાઇસ જેટની દિલ્હી અમદાવાદની ફ્લાઇટ સુરત ડાયવર્ટ કરવામાં આવી છે.અમદાવાદમાં વેધર ખરાબ હોવાથી આ ફ્લાઇટ સૂરત ડાયવર્ટ કરવામાં આવી છે.

અમદાવાદ શહેરના સામાન્ય વરસાદમાં જ શહેરના ગરનાળા પાણીથી ભરાઇ ગયા છે. ગુજરાત કોલેજથી એલિસબ્રિજ વચ્ચે આવેલા ગળનાળામાં પાણી ભારતા વાહન ચાલકોના વાહન બંધ થયા છે. લોકો હાલમાં મુશ્કેલીનો સામનો કરી રહ્યા છે.

અમદાવાદ શહેરમાં વરસાદ શરૂ થતાની સાથે જ શહેરમાં ઘણા સ્થળોએ વૃક્ષ પડવાની ફરિયાદો પણ સામે આવી રહી છે. અમદાવાદમાં પવન સાથે વરસાદ શરૂ થયો છે ત્યાં જ શહેરના વાડજ, ઘીકાંટા અને અમદાવાદના પૂર્વ વિસ્તારમાં પવન સાથે ધોધમાર વરસાદ વરસી રહ્યો છે.

અમદાવાદીઓ છેલ્લા કેટલાક દિવસોથી ગરમીમાં સેકાઇ રહ્યા હતા. ત્યાં જ આજે સાંજે મેઘરાજાની એન્ટ્રી થતા શહેરીજનો ખુશ થઇ ગયા છે. અને વરસાદ પડતાની સાથે જ શહેરમાં ઠંડક પ્રસરી ગઇ છે. આજે શહેરમાં સાંજે 6 વાગ્યાની આસપાસ પવનના સૂસવાટા સાથે વરસાદ પડતા શહેરીજનો ઘરની બહાર નીકળી વરસાદનો આનંદ માણી રહ્યા છે.