Gujarat Monsoon Update: ગુજરાતમાં ધોધમાર વરસાદની આગાહી, મંગળવારે 8 અને બુધવારે 7 જિલ્લામાં યલો એલર્ટ

ગુજરાતમાં છેલ્લા કેટલાક દિવસોથી ધોધમાર વરસાદ વરસી રહ્યો છે ત્યારે હવામાન વિભાગ દ્વારા આગામી મંગળવારના રોજ પણ ભારે વરસાદની આગાહી કરવામાં આવી છે. મંગળવારે ગુજરાતને વધુ એક વખત મેઘરાજા ધમરોળશે. દક્ષિણ, ઉત્તર અને સૌરાષ્ટ્રના 2 જિલ્લામાં હવામાન વિભાગે ઓરેન્જ એલર્ટ પણ આપ્યું છે.

હવામાન વિભાગ અનુસાર, આગામી 16 ઓગસ્ટ મંગળવારે ગુજરાતને મેઘરાજા ધમરોળશે. આ દરમિયાન હવામાન વિભાગે મંગળવારે 8 જિલ્લામાં ઓરેન્જ એલર્ટ જાહેર કર્યું છે. સાથે જ બુધવારે 7 જિલ્લામાં યલો એલર્ટ જાહેર કરવામાં આવ્યું છે. ત્યાં જ દક્ષિણ ગુજરાતના 3 જિલ્લામાં ઓરેન્જ એલર્ટ જાહેર કરવામાં આવ્યું છે. બીજી તરફ હવામાન વિભાગ દ્વારા ઉત્તર ગુજરાતના 3 જિલ્લામાં ઓરેન્જ એલર્ટ અપાયું છે અને સૌરાષ્ટ્રના 2 જિલ્લામાં ઓરેન્જ એલર્ટ જાહેર કરાયુ છે.

હવામાન વિભાગ અનુસાર, 16 ઓગસ્ટના રોજ બનાસકાંઠા, સાબરકાંઠા, અરવલ્લી, મહિસાગર, ગીર સોમનાથ, સુરત, નવસારી અને વલસાડમાં ભારે વરસાદની આગાહી કરાઇ છે. ત્યાં જ 17 ઓગસ્ટે બનાસકાંઠા, પાટણ, સાબરકાંઠા, મહેસાણા, કચ્છ, અમરેલી અને ગીર સોમનાથમાં ભારે વરસાદની આગાહી કરા છે.

અરબી સમુદ્રમાં વેલ માર્ક લો પ્રેશર સક્રિય થતા માછીમારોને દરિયો ન ખેડવા સૂચના આપવામાં આવી છે. આ ઉપરાંત 15 ઓગસ્ટે નવસારી, વલસાડ, દમણ અને દાદરા નગર હવેલીમાં ભારેથી અતિભારે વરસાદની સંભાવના છે. જ્યારે બનાસકાંઠા, સાબરકાંઠા, મહેસાણા, અરવલ્લી, સુરત, ડાંગ અને તાપીમાં ભારે વરસાદ વરસી શકે છે.

તમને જણાવી દઇએ કે, સરદાર સરોવર નર્મદા બંધના ઉપરવાસમાં વરસાદ અને ઇન્દિરા સાગર ડેમમાંથી પાણી છોડવામાં આવતા હજુ પણ નર્મદા ડેમમાં 2 લાખ 20 હજાર ક્યુસેક પાણીની આવક થઈ રહી છે. જેને પગલે નર્મદા ડેમની જળ સપાટી 135.17 મીટર પર પહોંચી ગઇ છે. નર્મદા ડેમની મહત્તમ જળ સપાટી 138.68 મીટર છે હવે માત્ર 4 મીટર દૂર છે. હાલ નર્મદા ડેમ માં થી 2 લાખ 20 હજાર ક્યુસેક પાણીની આવક થઈ રહી છે. જેને કારણે નર્મદા ડેમના રેડિયલ 23 દરવાજા ખોલી 80,000 ક્યુસેક પાણી નદીમાં છોડવામાં આવી રહ્યું છે.