Rain forecast: ગુજરાતમાં અહીં વાવાઝોડાની આગાહી, 11 જિલ્લામાં લગાવાયા 3 નંબરના સિગ્નલો

ગુજરાતના દરિયામાં લો-પ્રેશર સર્જાયું છે અને દરિયાકાંઠે પવનની ગતિમાં વધારો થઈ શકે છે ત્યારે મિની વાવાઝોડા જેવી સ્થિતિની આશંકા ગુજરાતના દરિયાકાંઠે સેવાઇ રહી છે. જેથી ગુજરાતના તમામ બંદર પર 3 નંબરનું સિગ્નલ લગાવાયું છે. ત્યાં જ અહીં 30 થી 40 કિમીની ઝડપથી પવન ફંકાઈ શકે છે જેથી માછીમારોને દરિયો ન ખેડવા માટે ચેતવણી અપાઇ છે. ત્યાં જ માછીમારોને 5 દિવસ દરિયો ન ખેડવા સૂચના આપવામાં આવી છે.

આજથી પહેલી જુલાઈ સુધી માછીમારોને દરિયો ન ખેડવા ચેતવણી અપાઇ છે. ત્યાં જ 3 જિલ્લામાં આજે અતિભારે વરસાદ પડી શકે છે. બીજી તરફ 11 જિલ્લામાં ભારે વરસાદની સંભાવના છે.

હવામાન વિભાગ અનુસાર, સુરત, વલસાડ, નવસારીમાં અતિભારે વરસાદની આગાહી કરવામાં આવી છે. બનાસકાંઠા, સાબરકાંઠામાં ભારે વરસાદની આગાહી કરાઇ છે. દાહોદ, છોટાઉદેપુરમાં ભારે વરસાદની આગાહી અપાઇ છે. ભરૂચ, ડાંગ, તાપીમાં ભારે વરસાદની આગાહી હવામાન વિભાગ દ્વારા આપવામાં આવી છે.

અમરેલી, ભાવનગર, ગીર સોમનાથમાં ભારે વરસાદની આગાહી અપાઇ છે. જૂનાગઢમાં ભારે વરસાદની સંભાવના સેવાઇ રહી છે. ત્યાં જ જખૌ, માંડવી પર 3 નંબરનું સિગ્નલ લગાવાયું છે. મુંદ્રા, નવલખી, બેડી, દ્વારકા, ઓખા, પોરબંદર, વેરાવળ, દીવ, જાફરાબાદ, પીપાવાવ, ભાવનગર, દહેજ, ભરૂચમાં 3 નંબર સિગ્નલ લગાવાયું છે.

ત્યાં જ હાલમાં વલસાડમાં દરિયો તોફાની બન્યો છે. જિલ્લાના 70 કિલોમીટરના દરિયામાં ઊંચા તોતિંગ મોજા ઉછળી રહ્યા છે. સલામતીના ભાગરૂપે વલસાડ જિલ્લા પોલીસ વિભાગે લોકોને દરિયા કિનારાથી દૂર રહેવાના સૂચના આપી છે.

જણાવી દઇએ કે, ગઇ કાલે અમદાવાદ સહિત ગુજરાતના મોટાભાગના જિલ્લાઓમાં ધોધમાર વરસાદ વરસ્યો હતો. ત્યાં જ અમદાવાદમાં વાવાઝોડા સાથે વરસાદ વરસ્યો હતો. જેના કારણે શહેરીજનો મોટી મુશ્કેલીમાં મૂકાયા હતા તો શહેરમાં લગભગ 300 જેટલા વૃક્ષો પડી ગયા હતા.