Gujarat Assembly Election: ગુજરાતમાં 1962માં યોજાયેલી પહેલી વિધાનસભા ચૂંટણીની દુર્લભ તસવીરો

અમદાવાદમાં ‘ઇનક્રેડિબલ ઇન્ક, ઇનક્રેડિબલ લીગસી’ નામથી એક ફોટો એક્ઝિબિશન યોજાયું છે. આ એક્ઝિબિશનમાં ચૂંટણીને લોકશાહીના અવસર તરીકે ઊજવતા ગુજરાતીઓની ઝાંખી જોવા મળે છે.

અમદાવાદ અને ગુજરાતની ચૂંટણીઓના ઇતિહાસ અને પરંપરાઓને દર્શાવતી તસવીરોમાં ગુજરાતીઓનો મતાધિકાર માટેનો ઉત્સાહ ઝળકે છે. આ એક્ઝિબિશન નાગરિકોમાં મતદાન કરવાનો ઉત્સાહ વધારે એવી અનેક તસવીરો મૂકવામાં આવી છે.

આ એક્ઝિબિશનના સંયોજક અને ઇતિહાસના જાણકાર  રિઝવાન કાદરીએ જણાવ્યું છે કે, ‘સૌથી પહેલાં અમદાવાદમાં મતાધિકારનો ઇતિહાસ કઈ રીતે ઉદ્ભવ્યો અને આગળ વધ્યો તેની ઝલક આ એક્ઝિબિશનમાં રજૂ કરવામાં આવી છે. અમદાવાદનો ઇતિહાસ રહ્યો છે કે જેમ આ શહેરના નાગરિકોએ સામેથી કર આપવાનું સ્વીકારીને સ્થાનિક સ્વશાસનની સંસ્થાનો પાયો નાખ્યો હતો. તેમ 1874માં નાગરિકોએ સામેથી ચૂંટણી કરાવવાની માગણી કરી હતી.’

તેમણે વધુમાં જણાવ્યુ હતુ કે, ‘એ વખતે માગણી નકારવામાં આવેલી, પરંતુ 1885ની 15મી ઓગસ્ટે અમદાવાદ શહેરમાં ગુજરાતની સર્વપ્રથમ ચૂંટણી યોજાઈ હતી. સાત વોર્ડની 14 બેઠકો માટે યોજાયેલી એ ચૂંટણીમાં 1914 મતદારોના મત માન્ય ઠર્યા હતા. એ ચૂંટણી અંગેના દસ્તાવેજની ઝલક પણ આ એક્ઝિબિશનમાં માણી શકાશે. દેશની સર્વપ્રથમ ચૂંટણી વખતે નાગરિકોની સમજ માટે તૈયાર કરવામાં આવેલી પુસ્તિકાનાં પાનાં પણ આ એક્ઝિબિશનમાં રજૂ કરવામાં આવ્યા છે.’

આ એક્ઝિબિશનમાં ચૂંટણીની પ્રક્રિયા અને લોકોનો ઉત્સાહ દર્શાવતી જીવંત તસવીરો મૂકવામાં આવી છે. મતપેટીથી લઈને ઈવીએમ સુધીના મતદાન પ્રક્રિયામાં આવેલાં પરિવર્તનોની ઝાંખી કરાવે છે.

અલગ ગુજરાત રાજ્ય થયા પછી 1962માં થયેલી ગુજરાત વિધાનસભાની પ્રથમ ચૂંટણીથી લઈને અમદાવાદ મ્યુનિસિપાલિટીની ચૂંટણીઓની દુર્લભ તસવીરો રજૂ કરવામાં આવી છે.

આ એક્ઝિબિશન અમદાવાદ મ્યુનિસિપલ કોર્પોરેશનના સરદાર ભવનમાં 30 નવેમ્બર સુધી સવારના 11થી સાંજના 5 સુધી જોઈ શકાશે.