ચૈત્ર સુદ પાંચમના દિવસે જોવાય છે ગાડલી, આવી રીતે જાણો ચોમાસું કેવું રહેશે?

વિભુ પટેલ, અમદાવાદ: શિયાળો, ઉનાળો અને ચોમાસાની ઋતુમાં તમામ લોકોને ચોમાસું કેવું રહેશે તે જાણવાની ઉત્સુકતા હોય છે. ખેડૂતો પણ ચોમાસું કેવું રહેશે, તેની આગાહીની રાહ જોતા હોય છે. હવામાન વિભાગ પવનની દિશા, ભેજનું પ્રમાણ , તાપમાન, સહિતના પરિબળોનો અભ્યાસ કરીને ચોમાસું કેવું રહેશે, તેનું અનુમાન જાહેર કરતાં હોય છે. અમુક લોકો નક્ષત્ર અને ગ્રહોની સ્થિતિ પરથી ચોમાસું કેવું રહેશે તેનો વર્તારો કાઢે છે. ટેક્નોલોજી ન હોતી ત્યારે ગામડામાં લોકો હોળીની જાર અને પવનની દિશા તેમજ ગાડલી, ચોમાસાનો ગર્ભ જોઈને અનુમાન લગાવતાં હતા વર્ષમાં કેટલા આની થશે. આની એટલે કે કેટલાક ટકા વરસાદ થશે.

હોળીના પવન બાદ ચૈત્ર સુદ પાંચમના દિવસે ગાડલી જોવાનો પણ મહિમા છે. ગાડલી એટલે રોહિણી નક્ષત્રનો આકાશમાં દેખાતો ત્રિકોણ સમૂહ. હવે ગાડલી જોવાય કેવી રીતે? પહેલાના જમાનામાં વેપારીઓ, ખેડૂતો ગાડલી જોઈને નક્કી કરતાં કે કેવું વર્ષે રહેશે? તે પ્રમાણ ખેતી કે ધંધા માટેનું આયોજન કરતાં હતાં.

હવામાન નિષ્ણાત આંબાલાલ પટેલ પણ નક્ષત્રો અને ગ્રહોની સ્થિતિ પરથી અનુમાન લગાવે છે. હોળીની જાર પરથી અનુમાન લગાવ્યા બાદ ગાડલી પણ જોવે છે.  આંબાલાલ પટેલનું કહેવું છે કે, ગાડલી ચૈત્ર સુદ પાંચમના દિવસે સાંજે જોવામાં આવે છે. રોહિણી નક્ષત્ર પાંચ તારાનું છે. તેનો આકાર ગાડાનો હોવાથી ગાડલી કહેવામાં આવે છે.

ચંદ્રમા વેપારી ગણાવામાં આવે છે. કૃતિકા નક્ષત્ર આસપાસ 6 તારાનું ઝૂમખું આવેલું છે. ગાડલીના 4 તારાનો ભાગ ગાડાની બેઠક ગણવી. તેમજ ઉપરનો ભાગ ધોસરો ગણવો. તારા અને ગાડા વચ્ચેના ભાગને ઉધ ગણવી. જે સાલમાં ગાડલીથી ચંદ્રમાં આગળ હોય તો વર્ષ સારું થાય અને વેપારીઓને લાભ થાય છે. જ્યારે ધોસરેથી ઉધ ઉપર ચંદ્રમાં હોય તો વેપારીઓને લાભ થાય છે અને વર્ષ સરભર થાય છે. ગાડા વચ્ચે ચંદ્રમાં હોય તો દુકાળ ગણવવામાં આવે છે.

ગાડલીથી ઉત્તરમાં ચંદ્રમા હોય તો વેપારીને કમાણી નહીં વર્ષ સાધારણ જાય છે. ચંદ્રમાં ગાડલીની પછવાડે હોય તો વર્ષ સારું થાય છે. ચંદ્ર અસ્ત પામતા કૃતિકા નક્ષત્ર આથમે તો વર્ષ સારું નહીં અને ખરાબ પણ નહીં, તેમ મનાય છે.