AAPના અમદાવાદમાં કાર્યક્રમે કર્યો ચક્કાજામ, ગોપાલ ઇટાલિયાએ પોલીસ વાન પર ચઢી કરી નારેબાજી 

હર્મેશ સુખડિયા, અમદાવાદ: આમ આદમી પાર્ટીનો એક પાર્ટી પ્લોટમાં કાર્યક્રમ હતો. જેમાં ગુજરાત પ્રદેશ પ્રમુખ ગોપાલ ઇટાલિયા અને દિલ્હીના એમ.એલ.એ સહિતના લોકો હાજર રહ્યા હતા. જોકે આ કાર્યક્રમની મંજૂરી આપતી વખતે 70થી 75 લોકોને જ હાજર રાખવાની શરતે મંજૂરી અપાઈ હતી. તેમ છતાં આ કાર્યક્રમમાં 300 જેટલા લોકો ભેગા થઈ ગયા અને ચક્કાજામ કરી સુત્રોચ્ચાર કરી ભાષણ કર્યા હતા. "ભાજપ હમસે ડરતી હે, પુલીસ કો આગે કરતી હે" આવા નારા લગાવી ગોપાલ ઇટાલિયા પોલીસ વાન પર ચઢી જતા આખરે પોલીસે કાર્યવાહી કરી હતી.

ગુજરાત યુનિ. પોલીસ સ્ટેશનમાં ફરજ બજાવતા પીએસઆઇ આર.સી.ધૂમમડએ આ ફરિયાદમાં ફરિયાદી બન્યા છે. ફરિયાદ પ્રમાણે હકીકત એવી છે કે, આમ આદમી પાર્ટીના અમજદખાન પઠાણની અરજી આધારે બપોરે 1.30થી 3.30 વાગ્યા સુધી ભૂમિ પાર્ટી પ્લોટમાં 70થી 75 લોકોની હાજરીમાં કાર્યક્રમની મંજૂરી અપાઈ હતી. ત્યારે બપોરે આપ પાર્ટીના ગુજરાત પ્રદેશ પ્રમુખ ગોપાલ ઇટાલિયા પણ આવી પહોંચ્યા અને સાથે સાથે દિલ્હીના એમ.એલ.એ આતિશીજી પણ આવી પહોંચ્યા હતા.

ત્યારે વધુ પ્રમાણમાં કાર્યકર્તાઓ ભેગા થઈ જતા પોલીસે ગોપાલ ઇટાલિયાને નિયમોનું પાલન કરી જેટલી સંખ્યાની મંજૂરી અપાઈ છે તેનાથી વધુ લોકોને રવાના કરવા સૂચના અપાઈ હતી. ત્યારે જોતજોતામાં આ સ્થળ પર 300 જેટલા લોકો ભેગા થઈ ગયા અને સોશિયલ ડિસ્ટન્સ જાળવ્યા વગર આયોજકોએ પોલીસ અને સરકાર વિરુદ્ધ ઉશ્કેરણીજનક ભાષણો શરૂ કર્યા હતા. ત્યારે પોલીસ સાથે ધક્કા મુકી કરી લોકો અંદર પ્રવેશ્યા અને બાદમાં નારા પણ લગાવ્યા હતા.

બાદમાં અહીં હાજર લોકોમાંથી મંજૂરી સિવાયના લોકોને રવાના ન કરી ગોપાલ ઇટાલિયાએ નારેબાજી શરૂ કરી હતી. "ભાજપ હમસે ડરતી હે પુલીસ કો આગે કરતી હે" આવા નારા લગાવી ગોપાલ ઇટાલિયા ભાન ભૂલીને પોલીસની જીપ પર ચઢી ગયો હતો.

જેથી વધારે પ્રમાણમાં  લોકોને ભેગા કરી, સોશિયલ ડિસ્ટનસનું પાલન ન કરી પોલીસ સાથે ઘર્ષણ કરનારા મિહિર પટેલ, અમજદ ખાન પઠાણ, ગિરિશ રાવલ સામે આઈપીસી 143, 186, 188, 332 અને અન્ય કલમો હેઠળ ગુનો નોંધી યુનિ. પોલીસે કાર્યવાહી હાથ ધરી છે.

આ ઘર્ષણ સમયે એક પોલીસ કોન્સ્ટેબલને પણ ભીડમાં કોઈ વ્યક્તિએ જોરથી પેટમાં ફેટ મારી હોવાનું પણ સૂત્રોએ જણાવ્યું છે.