અમદાવાદનો કિસ્સોઃ વારંવાર ફોન કરીને મળવા બોલાવતા મહિલાએ ના પાડી, આરોપીએ વટાવી તમામ હદ

નવીન ઝા, અમદાવાદઃ શહેરમાં રેહતી એક મહિલાએ સાયબર પોલીસ સ્ટેશનમાં (cyber police station) ફરિયાદ નોંધાવી હતી. અને જેમાં તેને ઉલ્લેખ કર્યો હતો કે કોઈ વ્યક્તિએ તેના પ્રોફાઈલ પિકચર લઈ ફેસબૂક અને ઇન્સ્ટાગ્રામ (Facebook and Instagram) ઉપર આઈ ડી બનાવી તેના ફોટોનો ઉપયોગ કરી તેને હેરાન પરેશાન કરી રહ્યો છે. ફરિયાદ મળતા સાયબર ક્રાઈમ દ્વારા તપાસ શરૂ કરવામાં આવી હતી અને પોલીસે એક આરોપીની ધરપકડ કરી લીધી છે.

પોલીસની તપાસમાં સામે આવ્યું છે કે આરોપી રાજુ લુહાર ACના શોરૂમમાં કામ કરે છે. અને તેને મહિલાને હેરાન પરેશાન કરવા માટે આવું કર્યું છે. તેને અલગ અલગ નામથી ફેક આઈડી (fake ID) બનાવી હતી.

પોલીસે વધુ તપાસ શરૂ કરી તો જાણવા મળ્યું છે કે આરોપી પહેલા સિક્યુરિટીમાં કામ કરતો હતો. ત્યારે ફરિયાદી સાથે તેની મિત્રતા થઈ હતી અને આરોપી મહિલાને છેલ્લા ઘણા સમયથી ફોન કરી વારંવાર મળવા બોલાવી રહ્યો હતો.

પરંતુ ફરિયાદી છેલ્લા 4 મહિનાથી આરોપીને મળવા ગઈ નહતી. જેથી આરોપીને મનમાં લાગી આવતા તે રોષે ભરાઈ ગયો અને બદલો લેવા તેને આ કૃત્ય કર્યા હોવાનું સામે આવ્યું છે. હાલ પોલીસે આરોપીની ધરપકડ કરી મોબાઈલ કબ્જે કરી લીધું છે.

નોંધનીય છે કે આવી રીતે ખોટું એકાઉન્ટ સોશિયલ મીડિયામાં (social media) બનાવી યુવતીઓને હેરાન કરવાના કિસ્સાઓ વધી રહ્યાં છે અને સાયબર ક્રાઈમ બ્રાન્ચ આવા લોકો સામે કાર્યવાહી કરી રહી છે.