Gujarat corona update: ગુજરાતમાં કોરોનાનો સફાયો, ક્યાં કેટલા કેસ નોંધાયા?

અમદાવાદઃ ગુજરાતમાં કોરોના વાયરસના કેસોમાં ધરખમ ઘટાડો નોંધાયો છે. તો બીજી તરફ ઓમિક્રોનનો નવો વેરિએન્ટે પણ વિશ્વમાં ફફડાટ ફેલાવી રાખ્યો છે. મુંબઈમાં નવા વેરિએન્ટના દર્દીઓ પણ દેખાવાના શરૂ થયા છે. આવી પરિસ્થિતિ વચ્ચે ગુજરાતમાં કોરોનાની સ્થિતિ સુધરી છે. ગુજરાતમાં છેલ્લા 24 કલાકમાં કોરોનાના (covid-19 case) 8 કેસ નોંધાયા છે. જ્યારે નવ દર્દીઓ સાજા થયા છે.

ગુજરાત સરકારના આરોગ્ય વિભાગે આપેલા આંકડા પ્રમાણે ગુજરાતમાં છેલ્લા 24 કલાકમાં કોરોના વાયરસના નવા આઠ કેસ નોંધાયા છે તો બીજી તરફ નવ દર્દીઓએ કોરોનાને મ્હાત આપી છે. આ કોરોનામાંથી સાજા થવાનો દર 99.10 ટકા નોંધાયો છે. જ્યારે રાજ્યભરમાં એકપણ દર્દીએ કોરોનાથી જીવ ગુમાવ્યો નથી.

રાજ્યના વિવિધ જિલ્લા અને મહાનગર પાલિકાઓમાં કોરોનાની સ્થિતિ અંગે વાત કરીએ તો અમદાવાદ કોર્પોરેશમાં 3, ખેડામાં 2, ગાંધીનગર કોર્પોરેશનમાં 1, કચ્છમાં 1 કેસ નોંધાયો છે. આ ઉપરાંતના મહાનગરપાલિકાઓ અને જિલ્લાઓમાં કોરોના વાયરસનો સફાયો થયો છે.

એક્ટીવ કેસોની વાત કરીએ તો ગુજરાતમાં અત્યારે કોરોના વાયરસા કુલ 73 એક્ટીવ કેસો છે. જેમાંથી બે વેન્ટીલેટર ઉપર છે. જ્યારે 71 દર્દીઓ સ્ટેબલ છે. અત્યાર સુધીમાં રાજ્યમાં 1212956 દર્દીઓ ડીસ્ચાર્જ કરાયા છે. જ્યારે 10942 લોકોનું મોત નીપજ્યું છે.

રાજ્યમાં રસીકરણની વાત કરીએ તો બુધવારે પાંચ વાગ્યાથી ગુરુવાર સાંજના ચાર વાગ્યા સુધીમાં રાજ્યભરમાં કુલ 34,437 લોકોનું રસીકરણ થયું છે. જેમાંથી 12-14 વર્ષના કુલ 6138 બાળકોને પ્રથમ ડોઝ આપવામાં આવ્યો છે. આ ઉપરાંત 7607 લોકોને પ્રેકોશન ડોઝ આપવામાં આવ્યો છે.