PSM @100: પ્રમુખ સ્વામી શતાબ્દી મહોત્સવમાં આજની પેઢી ન જોઈ હોય તેવી એન્ટિક વસ્તુઓનું કલેક્શન

અમદાવાદઃ 15 જાન્યુઆરી સુધી ચાલનારા પ્રમુખ સ્વામી શતાબ્દી મહોત્સવમાં અનેક આકર્ષણ છે. તેમાં આજની પેઢીએ ક્યારેય ના જોઈ હોય તેવી વસ્તુઓનું એક કલેક્શન પણ રાખવામાં આવ્યું છે. જે ખરેખર જોવાલાયક છે. અહીં આવતા દરેક વ્યક્તિ તેને જોઈને અભિભૂત થઈ જાય છે.

આમ જોવા જઈએ તો, પ્રમુખ સ્વામીનગરમાં પ્રવેશવા માટે 6 જુદા-જુદા દ્વાર બનાવવામાં આવ્યા છે. તેમાં મૂકવામાં આવેલી એન્ટિક વસ્તુઓ ખરેખર અદ્ભુત છે.

ઓસ્ટ્રેલિયાથી આવેલા રાજેશ પટેલ જણાવે છે કે, ‘અહીં જોવા મળેલી એન્ટિક વસ્તુઓ આજની યુવા પેઢીએ ચિત્રમાં જ જોઈ હશે. વર્ષો જૂનો પટારો, અનાજ દળવાની ઘંટી, માખણ બનાવવાનું વલોણું નાના હતા ત્યારે જોયું હશે. જે પહેલાં માત્ર ચિત્રોમાં જ જોવા મળતા હવે રૂબરુ જોવા મળે છે.’

મહોત્સવમાં સેવા આપી રહેલા સ્વંયસેવક ઘનશ્યામ વઘાસિયા જણાવે છે કે, ‘અહીં એન્ટિક વસ્તુ કલેક્શન અને પ્લાન્ટેશનનો અદ્ભુત સમન્વય આકર્ષણનું કેન્દ્ર બન્યો છે. દરેક દ્વારમાં આ પ્રકારે અલગ અલગ એન્ટિક કલેકશન જોવા મળે છે. સાત નંબરના પ્રવેશદ્વાર પાસે સુંદર મજાનું દમણીયું ગાડું મૂકવામાં આવ્યું છે. તેને પ્લાન્ટેશન અને ફુલછોડ સાથે સજાવવામાં આવ્યું છે. પ્રમુખ સ્વામી મહારાજ પણ વર્ષો પહેલાં દમણીયામાં બેસી વિચરણ કરતા હતા.’

તેવી જ રીતે માટીની મોટી કોઠી જે હાલ ક્યાંય જોવા મળતી નથી. તેમાં અનાજ ભરવામાં આવતું હતું. તેને એક જગ્યાએથી બીજી જગ્યાએ ફેરવવી અશક્ય હતી. તેને અહીં મૂકવામાં આવી છે. પટારા પહેલાં ગામડામાં જોવા મળતા હતા. તેમાં કિંમતી ચીજવસ્તુઓ સંગ્રહિ કરવામાં આવતી હતી. તેને પણ ફૂલોની સાથે સજાવટ કરીને મૂકવામાં આવ્યા છે.

પ્રમુખ સ્વામી મહારાજે એમ્બેસેડરમાં પણ વિચરણ કર્યું છે. એક સમયે એમ્બેસેડર રુઆબદાર લોકો જ રાખતા તે પણ અહીં મૂકાઈ છે. આ ઉપરાંત છાશ બનાવવાનું વલોણું, અનાજ દળવાની ઘંટી પ્લાન્ટેશન સાથે ગોઠવામાં આવ્યાં છે.

પાણી ગરમ કરવાનું સાધન, અનાજ સંગ્રહ કરવાના સાધન તેમજ ટુ વ્હીલર, સની નામનું વ્હીકલ, એલએમએલ વેસ્પા પણ ફ્લાવર પ્લાન્ટેશન સાથે મૂકવામાં આવી છે.