'AMCની બેદરકારીને કારણે અમારો જીવ ગયો હોત,' અમદાવાદના ખાડામાં આખેઆખી કાર ખાબકી

અમદાવાદ: શહેરમાં સીટીએમ વિસ્તારમાં એક મહિનાથી મસમોટો ખાડો પડ્યો છે. જેમાં આજે સવારે એક કાર તે જ ખાડામાં ખાબકી હતી. જેના કારણે કારને મોટું નુકસાન થયું છે. આ સાથે કારમાં સવાર લોકોને પણ સામાન્ય ઇજા પહોંચી છે. આ કારને ક્રેઇન દ્વારા ખાડામાંથી હાલ બહાર કાઢી લેવામાં આવી છે.

આજે વહેલી સવારે આ અકસ્માત થવાને કારણે આસપાસનાં સ્થાનિક લોકોમાં પણ રોષ જોવા મળ્યો છે. આપને જણાવીએ કે, આ મસમોટા ખાડાની ઉપર માત્ર પતરાં જ લગાવાવમાં આવ્યા હતા.

આ અંગે મળતી માહિતી પ્રમાણે, આ કારમાં સવાર ચલાકો એરપોર્ટથી આણંદ જઇ રહ્યા હતા.

જ્યાં અચાનક જ રસ્તા પર અંધારાને કારણે પતરું ન દેખાતા કાર ધડામ દઇને ખાડામાં ખાબકી હતી. કારમાં સવાર લોકોને સામાન્ય ઇજા પહોંચતા તેમની સારવાર કરાવવામાં આવી છે. જ્યારે ગાડીને પણ ઘણું જ નુકસાન પહોંચ્યું છે.

કાર ચાલક સંજયભાઇનાં જણાવ્યા પ્રમાણે, આ લોકો કાર લઇને એરપોર્ટથી આણંદ જઇ રહ્યા હતા. તે દરમિયાન આજે સવારે આજે સવારે 5.30 કલાકની આસપાસ અમે અહીંથી પસાર થઇ રહ્યા હતા. ત્યારે આ ખાડા પાસે કોઇ બેરિકેટ કે પટ્ટી કે લાઇટ લગાવી ન હતી. જેથી અમને ખબર ન પડી. ખબર પડી કે આગળ ખાડો છે ત્યારે ગાડી જેટલી કંટ્રોલ થાય તેટલી કરી લીધી તો પણ ગાડી સીધી ખાડામાં ખાબકી ગઇ હતી.

તેમણે વધુમાં જણાવ્યુ કે, તંત્રની આ બેદરકારીએ અમારો જીવ પણ ગયો હોત. મારી સાથે મારા સાહેબ હતા જેમને નાકમાં ઇજા થઇ છે. અને મને છાતીમાં દુખે છે. અમારી ગાડી આગળથી ખલાસ થઇ ગઇ છે અને ઘણું જ નુકસાન થયું છે.

આ અકસ્માતને કારણે લોકોમાં ભારે રોષ જોવા મળ્યો છે. લોકો જણાવી રહ્યા છે કે, આ ખાડો એક મહિનાથી પાડવામાં આવ્યો છે. જેના કારણે આ રસ્તા પર ઘણો જ ટ્રાફિક થઇ જાય છે અને અકસ્માતનો પણ ભય રહે છે. લોકોએ રોષ વ્યક્ત કરતા એમ પણ જણાવ્યુ કે, રસ્તા પર માત્ર પતરા લગાવી દેવાથી એએમસીનું કામ પતી જાય છે? તેમની જવાબદારી નથી કે કોઇ સાઇન બોર્ડ કે સૂચના કે બેરિકેટ ખાડા પાસે મૂકે જેના કારણે લોકને ખબર પડે કે, અહીં ખાડો છે. જે લોકો રોજ આવતા હોય તેમને ખબર હોય કે, અહીં મોટો ખાડો છે પરંતુ જેમને ખબર નથી, જે પહેલીવાર આવી રહ્યા છે તેમને ક્યાંથી ખબર પડે કે અહીં ખાડો છે.