ગુજરાતનાં 18માં મુખ્યમંત્રી લેશે આજે શપથ, ભુપેન્દ્ર પટેલની રાજકીય સફર પર એક નજર

ગાંધીનગર: ગુજરાતમાં ભાજપે પ્રચંડ બહુમતી સાથે ગુજરાતમાં સત્તા મેળવી છે. ત્યારે આજે ભુપેન્દ્ર રજનીભાઇ પટેલ ગુજરાતનાં 18માં મુખ્યમંત્રી બનાવા માટે શપથ લઇ રહ્યા છે. શનિવારે વિધાનમંડળની ભાજપની બેઠકમાં તેમને વિધાનસભા ગૃહના નેતા તરીકે ચૂંટી લેવામાં આવ્યા હતા. આજે સોમવારે તેઓ હોદ્દો અને ગુપ્તતાના શપથ લેશે. તો આજે આપણે તેમની રાજકીય સફર પર એક નજર કરીએ.

ભૂપેન્દ્ર પટેલે ડિપ્લોમા ઈન સિવિલ એન્જિનિયરિંગ કર્યુ છે. તેઓ કડવા પાટીદાર સમાજના અગ્રણી નેતા છે. એટલું જ નહીં, તેમના પિતા રજનીભાઈ પટેલ અમદાવાદના દરિયાપુર વિસ્તારની કડવાપોળમાં રહેતા હતા. આ કારણથી જ ભૂપેન્દ્રભાઈને કડવાપોળના લાડીલા તરીકે પણ ઓળખવામાં આવે છે. ભૂપેન્દ્રભાઈ પૂર્વ મુખ્યમંત્રી આનંદીબેન પટેલના વિશ્વાસુ માનવામાં આવતા હતા. આનંદીબેન પટેલે ઘાટલોડિયા બેઠક ખાલી કરી તો તેમણે ભૂપેન્દ્ર પટેલને અહીંથી ટિકિટ અપાવી હતી.

ભૂપેન્દ્ર પટેલનું બાળપણ મૂળ અમદાવાદના દરિયાપુર વિસ્તારની કડવાપોળમાં વિત્યું છે. આજે પણ દરિયાપુર વિસ્તારમાં તો ભૂપેન્દ્રભાઈને લોકો 'કડવાપોળના લાડકવાયા' તરીકે જ બિરદાવે છે.

2017માં ઘાટલોડિયા વિધાનસભા બેઠક પરથી પહેલીવાર ચૂંટણી લડ્યા અને પહેલી જ વિધાનસભા ચૂંટણીમાં 1,17,750 મતની જંગી સરસાઈથી જીત્યા હતા. જે ગુજરાતમાં સૌથી મોટી લીડ હતી. આ ચૂંટણીમાં તેમણે પોતાનો જ રેકોર્ડ તોડ્યો હતો અને 1,92,000થી વધુની લીડથી જીત્યા છે.

ભૂપેન્દ્રભાઈ 1999-2000, 2004-05 સુધી મેમનગર નગરપાલિકાના ચેરમેન રહ્યા હતા. તે પછી તેઓ 2010થી 2015 સુધી અમદાવાદ મ્યુનિ. કોર્પોરેશનની સ્ટે. કમિટીના ચેરમેન રહ્યા હતા.

ભૂપેન્દ્ર પટેલ પોતાના મત વિસ્તારમાં અને પાર્ટીના કાર્યકરોમાં 'દાદા'ના હુલામણા નામથી ઓળખાય છે. તેમને ક્રિકેટનો પણ શોખ રહ્યો છે.

ભૂપેન્દ્ર પટેલે 2015-17 દરમિયાન ઔડાના ચેરમેનનો અતિ મહત્ત્વપૂર્ણ હોદ્દો પણ સંભાળ્યો છે. ભૂપેન્દ્ર પટેલનો 15 જુલાઈ 1962ના રોજ જન્મ થયો હતો. તેઓ વ્યવસાયે બિલ્ડર ભૂપેન્દ્ર પટેલ શીલજ વિસ્તારમાં કલ્હાર રોડ પરની આર્યમાન રેસિડન્સમાં રહે છે.

ભૂપેન્દ્ર પટેલ પોતાના મતવિસ્તારમાં મજબૂત લોકસંપર્ક ધરાવે છે. ગુજરાતના 62 વર્ષના ચૂંટણી ઇતિહાસમાં તે પહેલા પાટીદાર મુખ્યમંત્રી છે જે ચૂંટણી જીતીને બીજીવાર મુખ્યમંત્રી બનશે.